Nokkrar íþróttabækur í jólaflóðinu

(Nóv. 07) Nokkrar íþróttabækur eru gefnar út fyrir þessi jól sem vert er að gefa gaum og sagt er frá í Bókatíðindum:

Hæst ber bókin HETJURNAR OKKAR - ÍÞRÓTTAMENN ÁRSINS Í HÁLFA ÖLD, sem Samtök íþróttafréttamanna gefa út. Mjög er vandað til verka í þessari bók sem er einstök heimild um þetta afreksíþróttafólk. Nánar um þessa bók síðar sem fer í prentun nú í vikunni og verður kynnt með pompi og pragt. Höfundur er Hallgrímur Indriðason.

ÍSLENSK KNATTSPYRNA eftir Víði Sigurðsson íþróttafréttamann er auðvitað Biblía allra knattspyrnuáhugamanna á Íslandi og ómissandi um hver jól til að rifja knattspyrnuárið upp. Ómetanleg heimild.

VORMENN ÍSLANDS eftir Jón M. Ívarsson, sagnfræðing, hefur að geyma aldarlanga sögu samtakanna. Bókin er í stóru broti, rúmlega 700 síður og prýdd miklum fjölda mynda. Hún er í senn íþróttasaga og þjóðlífssaga í 100 ár.


SÁ BESTI fjallar um Cristiano Ronaldo, Portúgalann unga hjá Manchester United. Bókin er skráð af Guðjóni Inga Eiríkssyni og gefin út af Bókaútgáfunni Hólum.

FRÆKIÐ FÓLK Í ÍÞRÓTTUM fjallar um feðga og mæðgur í íþróttum en mikill fjöldi þekktra íþróttamanna kemur við sögu. Útgefandi er Bókaútgáfan Æskan.

Þá er bók á leiðinni frá HSÍ í tilefni 50 ára afmælis sambandsins og vonandi kemur hún út fyrir jólin.