FRÉTTIR

Heiðar Helguson er íþróttamaður ársins 2011

(Maí '11) Heiðar Helguson var í kvöld útnefndur íþróttamaður ársins 2011 af Samtökum íþróttafréttamanna en hófið fór fram á Grand Hótel. Heiðar hlaut 229 stig í kjörinu, 30 meira en spjótkastarinn Ásdís Hjálmsdóttir sem varð í öðru sæti. Körfuboltamaðurinn Jakob Örn Sigurðarson varð síðan í þriðja sæti með 161 stig.

Þetta var í 56. sinn sem íþróttamaður ársins er valinn og er Heiðar að fá þessi verðlaun í fyrsta sinn en hann hafði aldrei áður verið meðal tíu efstu. Heiðar er 37. íþróttamaðurinn sem verður þessa heiðurs aðnjótandi en ellefu sem hafa verið kosnir íþróttamenn ársins hafa unnið þessi verðlaun oftar en einu sinni.

Heiðar er sjöundi knattspyrnumaðurinn sem er kosinn íþróttamaður ársins og sá fyrsti síðan að Margrét Lára Viðarsdóttir var valin árið 2007. Knattspyrnumenn hafa hlotið verðlaunin níu sinnum því bæði Ásgeir Sigurvinsson og Eiður Smári Guðjohnsen hafa hlotið þessa viðurkenningu tvisvar sinnum.

Knattspyrnufólk var annars áberandi meðal efstu manna í kjörinu því Sara Björk Gunnarsdóttir varð í 4. sæti, Kolbeinn Sigþórsson í 5. sæti og Þóra Björg Helgadóttir endaði í 6. sæti í kjörinu í ár.

31 íþróttamaður fékk atkvæði að þessu sinni og komu þeir úr sextán íþróttagreinum.

Óskar Ófeigur Jónsson skrifaði fyrir Vísi.

Átta nýliðar í hópi tíu efstu

(Desember '11) Allir 22 meðlimir Samtaka íþróttafréttamanna nýttu atkvæðisrétt sinn í kjöri íþróttamanns ársins sem verður lýst á Grand Hótel í Reykjavík þann 5. janúar næstkomandi. Alls fékk 31 íþróttamaður atkvæði en eins og venjan er á aðfangadag eru hér tilkynntir þeir tíu íþróttamenn sem fengu flest atkvæði, í stafrófsröð:

Anna Úrsúla Guðmundsdóttir, Val (handbolti)

Aron Pálmarsson, THW Kiel (handbolti)

Ásdís Hjálmsdóttir, Glímufélaginu Ármanni (frjálsíþróttir)

Heiðar Helguson, Queens Park Rangers FC (knattspyrna)

Jakob Örn Sigurðarson, Sundsvall Dragons (körfubolti)

Kári Steinn Karlsson, Breiðabliki (frjálsíþróttir)

Kolbeinn Sigþórsson, AFC Ajax (knattspyrna)

Ólafur Björn Loftsson, Nesklúbbinum (golf)

Sara Björk Gunnarsdóttir, LdB FC Malmö (knattspyrna)

Þóra Björg Helgadóttir, LdB FC Malmö (knattspyrna)

Þess má geta að aðeins tveir af ofantöldum hafa áður komist í hóp tíu efstu í kjöri íþróttamanns ársins. Þóra Björg tvívegis og Aron einu sinni. Enginn úr þessum hópi hefur þó hlotið sæmdarheitið áður og því ljóst að nýtt nafn bætist í hóp þeirra útvöldu þegar íþróttamaður ársins verður útnefndur í 56. sinn.

Nýr félagi í SÍ - stjórnin óbreytt

(Maí '11) Aðalfundur Samtaka íþróttafréttamanna var haldinn þann 20. maí í fundarsal UMFÍ. Sigurður Elvar Þórólfsson var endurkjörinn formaður til næstu tveggja ára en hann var að ljúka sínu fyrsta kjörtímabili. Gjaldkeri og ritari stjórnar eru kosnir til eins árs í senn og voru þeir Jón Kristján Sigurðsson og Eiríkur Stefán Ásgeirsson endurkjörnir í þær stöður. Enginn stjórnarmeðlimur fékk mótframboð.

Hjörtur Júlíus Hjartarson og Tómas Þór Þórðarson verða áfram varamenn í sjórn.

Ein aðildarumsókn barst og var hún samþykkt einróma. Haukur Harðarson, íþróttafréttamaður á Rúv, er því nýjasti meðlimur SÍ sem telur nú 22 meðlimi. Engin umsókn um aukafélagsaðild barst.

Engar tillögur bárust um lagabreytingar og engar athugasemdir voru gerðar við ársreikninga. Þá var farið yfir starfsárið á fundinum eins og venja er.

Aðalfundur 20. maí 2011

(Maí '11) Stjórn Samtaka íþróttafréttamanna boðar til aðalfundar föstudaginn 20. maí næstkomandi. Fundað verður í höfuðstöðvum UMFÍ í Sigtúni 42. Fundurinn hefst klukkan 13.00.

Venjuleg aðalfundarstörf.

Erlingur fékk heiðursverðlaun AIPS

(Janúar '11) AIPS, sem eru alþjóðasamtök íþróttafréttamanna, veittu í gær sundþjálfaranum Erlingi Jóhannssyni heiðursviðurkenningu en Erlingur lést á síðasta ári. Erlingur var einn af frumkvöðlum í sundþjálfun fatlaðra á Íslandi og fékk hann AIPS Power of Sports Awards verðlaunin á hátíðarsamkomu AIPS í Sviss í gær.

Nawal El Moutawakel frá Marokkó og May El Khalil frá Líbanon fengu einnig þessa viðurkenningu. Moutawakel er fyrsta konan frá Afríku sem vann til gullverðlauna á Ólympíuleikum og Khalil er frumkvöðull að maraþonhlaupi sem fram fer í Beirút árlega

Halldór Guðbergsson sem keppti á heimsleikum fatlaðra í tvígang, 1988 og 1992 tók við verðlaununum fyrir hönd Erlings. Halldór æfði sund undir handleiðslu Erlings og þeir fóru saman á heimsleika. Halldór sagði m.a. að það væri mikill heiður fyrir hann að taka við þessari viðurkenningu fyrir hönd vinar síns.

Frétt á vef AIPS.

Alexander kjörinn íþróttamaður ársins 2010

(Janúar '11) Handknattleiksmaðurinn Alexander Petersson var í kvöld kjörinn íþróttamaður ársins 2010. Kjörið er sögulegt að því leyti að Alexander er fyrsti maðurinn af erlendu bergi brotinn til þess að hljóta nafnbótina. Hann er fæddur í Lettlandi árið 1980 en hefur verið íslenskur ríkisborgari síðan 2004.

Þetta er í 55. sinn sem kosið er um íþróttamann ársins en það eru samtök íþróttafréttamanna sem standa að kjörinu.

Knattspyrnumaðurinn Gylfi Þór Sigurðsson varð annar í kjörinu og fimleikakonan Íris Mist Magnúsdóttir varð þriðja en það er besti árangur fimleikakonu frá upphafi í kjörinu.

Handboltamenn eru áberandi á topp tíu listanum að þessu sinni enda stóð landsliðið sig frábærlega á EM í Austurríki og margir lykilmanna liðsins einnig að gera góða hluti í Evrópuboltanum. Alexander er sjötti handboltamaðurinn á níu árum sem kjörinn er íþróttamaður ársins.

Járnmaðurinn Alexander hefur unnið hug og hjörtu íslensku þjóðarinnar á undanförnum árum með óeigingjörnum og baráttuglöðum leik sínum. Hann er algjör lykilmaður í landsliðinu og stóð sig líkt og vanalega frábærlega á EM. Hann fékk fá tækifæri framan af ári hjá Flensburg en átti nær undantekningalaust góðan leik er hann fékk tækifæri. Hann söðlaði síðan um í sumar og gekk í raðir Fuchse Berlin sem Dagur Sigurðsson þjálfar.

Berlinarliðið hefur slegið í gegn í þýsku úrvalsdeildinni í vetur og komið öllum handboltaspekingum á óvart. Þar hefur Alexander farið mikinn og sýnt svo ekki verður um villst að hann er á meðal þeirra bestu. Alexander er þess utan frábær fyrirmynd. Auðmjúkur í framkomu, harðduglegur atvinnumaður sem lætur verkin tala og hlífir sér hvergi fyrir félaga sína.

Henry Birgir Gunnarsson skrifaði fyrir Vísi.

Nadal og Vlasic best hjá AIPS

(Desember '10) Tennismaðurinn Rafael Nadal frá Spáni og Blanka Vlasic, hástökkvari frá Króatíu voru valin íþróttamenn ársins af alþjóða samtökum íþróttafréttamanna, AIPS.

Nadal er efstur á heimslista tenniskarla um þessar mundir eftir að hafa unnið þrjú af fjórum stærstu mótum ársins í tennisheiminum. Nadal fékk 16,32% atkvæða í kjörinu sem á fimmta þúsund íþróttafréttamenn tóku þátt í frá 93 löndum. Annar varð Lionel Messi knattspyrnumaður hjá Barcelona með 14,97% og Andrés Iniesta samherji Messi hjá Barcelona varð þriðji.

Vlasic hafði yfirburði í hástökki kvenna á þessu ári. Hún vann 18 af þeim 20 mótum sem hún tók þátt í og varð Evrópumeistari í hástökki utandyra og heimsmeistari í hástökki innandyra. Vlasic fékk 19,76% atkvæða í kjörinu. Skíðakonan Lindsay Vonn varð önnur með 15.25% atkvæða og þriðja sætið kom í hlut tenniskonunnar Kim Clijsters frá Belgíu.

Félagsmenn AIPS völdu spænska landsliðið í knattspyrnu karla lið ársins. Fékk það yfir 40% atkvæða. Kanadíska íshokkí landsliðið varð í öðru sæti og blaklandslið Brasilíu í karlaflokki hreppti þriðja sætið.

Best heppnaði íþróttaviðburður ársins var að mati félagsmanna AIPS heimsmeistaramótið í knattspyrnu karla í Suður Afríku, Þar á eftir komu Vetrarólympíuleikarnir í Kanada og Wimbledon-mótið í tennis var í þriðja sæti.

Birtist á mbl.is.

Sex ný nöfn á listanum

(Desember '10) Í dag, Þorláksmessu, voru birt nöfn þeirra tíu íþróttamanna sem efstir urðu í kjöri Samtaka íþróttafréttamanna um íþróttamann ársins árið 2010. Alls fengu 26 íþróttamenn atkvæði í kjörinu en allir 21 meðlimur SÍ nýtti atkvæðisrétt sinn að þessu sinni.

Til fróðleiks má nefna að Ólafur Stefánsson er á listanum í tólfta sinn á sínum ferli. Þeir Alexander Petersson, Helga Margrét Þorsteinsdóttir og Hólmfríður Magnúsdóttir hafa einu sinni verið áður í hópi þeirra tíu bestu. Aðrir, sex talsins, eru nýliðar á listanum.

Íþróttamennirnir sem eru tilnefndir eru eftirfarandi, í stafrófsröð:

Alexander Petersson, handknattleiksmaður
Arnór Atlason, handknattleiksmaður
Aron Pálmarsson, handknattleiksmaður
Gylfi Þór Sigurðsson, knattspyrnumaður
Helga Margrét Þorsteinsdóttir, frjálsíþróttakona
Hlynur Bæringsson, körfuknattleiksmaður
Hólmfríður Magnúsdóttir, knattspyrnukona
Hrafnhildur Lúthersdóttir, fimleikakona
Íris Mist Magnúsdóttir, sundkona
Ólafur Stefánsson, handknattleiksmaður

Kjörinu verður lýst á Grand Hótel þann 5. janúar næstkomandi og verður hófið í beinni útsendingu í sjónvarpi Rúv.

Nýr meðlimur

(Desember '10) Nýr meðlimur var tekinn inn í Samtök íþróttafréttamanna á fundi þeirra í dag, mánudaginn 19. desember. Magnús Már Einarsson er starfsmaður vefsíðunnar Fótbolti.net og er 21. núverandi meðlimur samtakanna.

SÍ býður hann velkominn.

Engar breytingar á stjórn

(Maí '10) Aðalfundur Samtaka íþróttafréttamanna fór fram miðvikudaginn 12. maí síðastliðinn. Ekki var kosið til formanns í þetta skiptið en Sigurður Elvar Þórólfsson á nú eitt ár eftir af kjörtímabili sínu. Aðrir stjórnarmeðlimir eru kosnir til eins árs í senn. Jón Kristján Sigurðsson var endurkjörinn gjaldkeri og Eiríkur Stefán Ásgeirsson sem ritari. Þeir fengu engin mótframboð og hlutu einróma kosningu.

Kosið var um nýja varamenn stjórnar og hlutu þeir Tómas Þór Þórðarson og Hjörtur Hjartarson einróma kosningu.

Tveir nýir meðlimir voru teknir inn í SÍ á fundinum. Þeir eru Einar Örn Jónsson, RÚV og Kristján Jónsson, Morgunblaðinu. Fullgildir meðlimir eru því tuttugu talsins.

Tvær umsóknir, frá Þorsteini Gunnarssyni og Skúla Unnari Sveinssyni, um aukafélagaaðild bárust aðalfundinum og voru samþykktar.

Engar tillögur bárust um lagabreytingar. Farið var yfir starfsárið og ársreikningar kynntir.

Aðalfundur 12. maí

(Maí '10) Stjórn Samtaka íþróttafréttamanna boðar til aðalfundar miðvikudaginn 12. maí næstkomandi. Fundað verður í höfuðstöðvum UMFÍ í Sigtúni 42. Fundurinn hefst klukkan 12.00.

Venjuleg aðalfundarstörf.

Heimasíðan aftur virk

(Maí '10) Eftir rúmt ár í dvala er heimasíða Samtaka íþróttafréttamanna, www.sportpress.is, aftur orðin virk. Munu því birtast fréttir af starfi félagsins og meðlima þeirra aftur hér eftir því sem við á.

Ábendingar má senda á stjórnarmeðlimi félagsins, sem má finna hér.

Adolf Ingi kosinn í framkvæmdastjórn AIPS

(Apríl. '09) Adolf Ingi Erlingsson, fyrrverandi formaður SÍ, gerði sér lítið fyrir og náði kosningu inn í framkvæmdastjórn AIPS (Alþjóðasamtök íþróttafréttamanna).

Norðurlöndin sameinuðust um að bjóða Adolf Inga fram en hann er öllum hnútum kunnugur innan AIPS eftir að hafa starfað þar ötullega undanfarin ár. Adolf Ingi náði góðri kosning og flaug inn í framkvæmdastjórnina! SÍ óska Adolfi Inga til hamingju með þennan áfanga en þetta er í fyrsta skipti sem samtökin eignast fulltrúa þarna inni.

Sigurður Elvar kjörinn nýr formaður SÍ

(Apríl. '09) Aðalfundur SÍ fyrir árið 2008 var haldinn 22. apríl. Mæting var með ágætum en alls mættu 13 manns en einn þurfti að yfirgefa samkomuna áður en yfir lauk en alls eru 17 manns í félaginu.

Þorsteinn Gunnarsson, formaður SÍ, flutti skýrslu stjórnar en mikið var um að vera á síðasta ári. Hæst bar kjörið á íþróttamanni ársins en einnig fóru formaður og gjaldkeri á AIPS þing í Pekíng. Haldið var golfmót samtakanna en skugga bar á starfið í haust hversu margir íþróttafréttamenn misstu starfið sitt í kjölfar bankahrunsins. Þá komu ýmis mál inn á borð stjórnar vegna aðstöðuleysis á leikvöngum og fleira.

Jón Kristján Sigurðsson gjaldkeri lagði fram ársreikninga. Vegna uppgjörs á kostnaði við útgáfu bókarinnar Hetjurnar okkar varð tap á rekstri félagsins en engu að síður varð góður hagnaður á bókinni þegar uppi varð staðið.

Þá var komið að kosningum í stjórn. Þorsteinn gaf ekki kost á sér í formannsembætti og buðu tveir sig fram, Sigurður Elvar Þórólfsson og Adolf Ingi Erlingsson. Kosið var á milli þeirra og svo fór að Sigurður Elvar hafði betur í hörku slag og var því rétt kjörinn nýr formaður SÍ. Guðmundur Hilmarsson gekk einnig úr stjórn og var Eiríkur Stefán Ásgeirsson kjörinn í hans stað. Jón Kristján Sigurðsson var kjörinn áfram sem gjaldkeri. Í varastjórn voru kjörnir Hrafnkell Kristjánsson og Skúli Unnar Sveinsson.

Þá voru gerðar breytinga á lögum SÍ sem taka tillit til þeirra aðstæðna sem ríkja á íslenskum atvinnumarkaði í dag.
Undir liðnum önnur mál bar ýmislegt á góma en m.a. var samþykkt tillaga Víðis Sigurðssonar að fela stjórninni að finna flöt á því að aðstoða félagsmenn til þess að koma faglegum ábendingum á framfæri um íslenskt mál.

Aðalfundur SÍ fyrir árið 2008

(Apríl. '09) Aðalfundur Samtaka íþróttafréttamanna fyrir árið 2008 verður haldinn miðvikudaginn 22. apríl nk. kl. 11 á skrifstofum UMFÍ.
Dagskrá: Venjuleg aðalfundarstörf, samkvæmt lögum félagsins:
I. Inntaka nýrra félaga
II. Kosning fundarstjóra og fundarritara.
III. Skýrsla stjórnar og reikningar lagðir fram.
IV. Lagabreytingar.
V. Stjórnarkosning.
VI. Árgjald félagsmanna.
VII. Önnur mál.
VIII. Fundargerð lesin upp, fundarslit.

ATH! Tillögur að lagabreytingum þurfa að berast tveimur sólarhringum fyrir aðalfund samkvæmt lögum.

Enn fækkar í stéttinni

(Feb. '09) Breytingar voru gerðar á ritstjórn Fréttablaðsins og Vísis þannig að íþróttadeildir þessara miðla voru sameinaðar í eina og fækkað um eitt stöðugildi. Baldri Beck, íþróttafréttamanni á Vísi.is, var sagt upp störfum. Þrír íþróttafréttmenn eru því eftir á Fréttablaðinu og Vísi og munu þeir hér eftir sjá um skrif í báða miðlana.

Adolf Ingi í framboð

(Feb. '09) Adolf Ingi Erlingsson, íþróttafréttamaður á RÚV og fyrrum formaður SÍ, hefur ákveðið að bjóða sig fram í framkvæmdastjórn Alþjóðasamtaka íþróttafréttamanna, AIPS. Samtökin á Norðurlöndunum ákváðu að tefla fram einum fulltrúa og var leitað til Adolfs Inga enda með margra ára starfsreynslu innan AIPS og UEPS. Heimsþing AIPS fer að þessu sinni fram í Mílanó á Ítalíu um mánaðarmótin apríl/maí. Samtök íþróttafréttamanna styðja við bakið á Adolfi Inga í kosningabaráttunni. Ísland hefur aldrei átt fulltrúi í framkvæmdastjórn AIPS.

37% áhorf á íþróttamann ársins

(Feb. '09) Hvorki fleiri né færri en 37% landsmanna fylgdust með kjöri íþróttamanns ársins, samkvæmt mælingu á sjónvarpsáhorfi vikuna 29. des. til 3. janúar. Aðeins áramótaskaup sjónvarpsins hafði meira áhorf. Þetta staðfestir tilfinningu félaga í Samtökum íþróttafréttamanna hversu mikið áhorf er á þennan magnaða viðburð!

Nadal og Isinbayeva

(Jan. '09) Spænski tenniskappinn Rafael Nadal og rússneska stangarstökksdrottningin Yelena Isinbayeva voru kjörin íþróttamenn árisns 2008 í Evrópu af Samtökum íþróttafréttamanna í álfunni. Portúgalski knattspyrnumaðurinn Cristiano Ronaldo varð annar í kjöri karla og Bretinn Lewis Hamilton heimsmeistari í kappakstri þriðji. Þýska sundkonan Britta Steffen varð önnur kjöri kvenna og belgíska konan Tia Hellebaut Ólympíumeistari í hástökki þriðja.

Á atkvæðaseðli Samtaka íslenskra íþróttafréttamanna voru Ronaldo og Isinbayeva í efsta sæti.
 

Samúel Örn sæmdur gullmerki SÍ

(Jan. '09) Samúel Örn Erlingsson var sæmdur gullmerki Samtaka íþróttafréttamanna í samkvæmi samtakanna að loknu kjörki íþróttamanns ársins 2008 á Grand Hótel. Samúel Örn hóf störf sem íþróttafréttamaður hjá Ríkissjónvarpinu 1981, hann var yfirmaður deildarinnar um árabil og hætti störfum á síðasta ári. Samúel Örn var formaður Samtaka íþróttafréttamanna 1984-1987 auk annarra stjórnarstarfa og lét mikið til sín taka á alþjóða vettvangi íþróttafréttamanna en hann sat í stjórn Evrópusamtakanna  í nokkur ár. Þess má geta að fyrsta embættisverk hans fyrir SÍ á sínum tíma var að slá víxil svo samtökin gætu haldið Norðurlandaþing með sóma!

Ólafur Stefánsson íþróttamaður ársins 2008 með fullu húsi stiga

(Jan. '09) „ÞETTA var ótrúlegt ár hjá mér, jafnt líkamlega sem andlega og hreinlega bara á öllum sviðum. Ég er afar þakklátur fyrir það,“ sagði Ólafur Stefánsson handknattleiksmaður í samtali við Morgunblaðið eftir að hann var kjörinn Íþróttamaður ársins 2008 af Samtökum íþróttafréttamanna. Þetta var í þriðja sinn sem Ólafur hreppir hnossið en hann varð einnig fyrir valinu 2002 og 2003. Að þessu sinni hlaut Ólafur fullt hús stiga í kjörinu, 480. Í öðru sæti varð Snorri Steinn Guðjónsson, handknattleiksmaður, og í þriðja sæti varð Margrét Lára Viðarsdóttir knattspyrnukona.

„Ég er að toppa núna sem íþróttamaður 35 ára gamall vegna þess að fram kom hópur fullbúinna einstaklinga sem eru með mér í liði auk þess sem þjálfarinn er frábær,“ sagði Ólafur og vísar þar til félaga sinna í íslenska landsliðinu í handknattleik og þjálfara þess, Guðmundar Þórðar Guðmundssonar, sem á árinu unnu til silfurverðlauna í handknattleikskeppni Ólympíuleikanna í Peking. Eftir því var tekið að á meðan Ólafur var hylltur af gestum, sem viðstaddir voru kjörið í gær, vísaði hann út í salinn og benti á samherja sína í íslenska landsliðinu og forystumenn handknattleikshreyfingarinnar sem þar sátu.

„Ég held að það sé alveg ljóst að ég stæði ekki í þessum sporum, að vera kjörinn íþróttamaður ársins, án þess sem við unnum saman á Ólympíuleikunum þótt ég hafi átt frábært ár með félagsliði mínu. Þar af leiðandi lít ég á mig sem fulltrúa þessa hóps sem vann silfrið í Peking,“ sagði Ólafur spurður út í samherja sína sem hann tileinkaði heiðurinn (meira)

Tíu efstu í kjöri íþróttamanns ársins 2008

(23. des. '08) Atkvæði í kjöri Samtaka íþróttafréttamanna um Íþróttamann ársins 2008 hafa verið talin og liggur ljóst fyrir hvaða tíu íþróttamenn urðu í efstu sætum í kjörinu.

Nöfn þeirra í stafrófsröð eru:

Alexander Petersson,  handknattleiksmaður í  Flensburg
Eiður Smári Guðjohnsen, knattspyrnumaður í Barcelona
Guðjón Valur Sigurðsson, handknattleiksmaður í Rhein Neckar Löwen
Hermann Hreiðarsson, knattspyrnumaður í Portsmouth
Jón Arnór Stefánsson, körfuknattleiksmaður í KR
Katrín Jónsdóttir, knattspyrnukona í  Val
Margrét Lára Viðarsdóttir, knattspyrnukona í  Val
Ólafur Stefánsson, handknattleiksmaður í Ciudad Real
Snorri Steinn Guðjónsson, handknattleiksmaður í GOG
Þormóður Jónsson, júdómaður JR

24 félagsmenn eru í Samtökum íþróttafréttamanna og nýttu allir þeirra atkvæðisrétt sinn í kjörinu að þessu sinni. Atkvæðagreiðslan er leynileg og fer þannig fram að hver félagsmaður SÍ setur saman lista með nöfnum tíu íþróttamanna sem honum þykja hafa skarað fram úr á árinu.
Helstu styrktaraðilar Samtaka íþróttafréttamanna vegna kjörsins eru Glitnir og Icelandair.
Kjörinu verður lýst á Grand Hótel Reykjavík föstudaginn 2. janúar klukkan 19.35 í beinni útsendingu í Ríkissjónvarpinu. 
Áður en kjöri íþróttamanns ársins verður lýst mun ÍSÍ afhenda viðurkenningar til þeirra íþróttakarla og -kvenna hjá sérsamböndum sínum sem þótt hafa skarað fram úr á árinu 2008. Þetta verður í fjórtánda sinn sem Samtök íþróttafréttamanna og ÍSÍ standa að sameiginlegri hátíð sem nær hápunkti þegar Íþróttamaður ársins 2008 verður útnefndur.

Samtök íþróttafréttamanna óska landsmönnum gleðilegra jóla og farsæls komandi árs.

Samhugur Norðurlandaþjóðanna

(Des. '08) Samtök íþróttafréttamanna í Danmörku höfðu frumkvæðið að því fyrir skömmu að Norðurlandaþjóðirnar settu á laggirnar sjóð fyrir íslenska kollega sína í fjárhagskröggum, ef á þyrfti að halda. Norðurlandaþjóðirnar Danmörk, Svíþjóð, Noregur og Finnland hafa samþykkt að setja 10 þúsund evrur hver í sjóðinn sem verður því samanlagt 40 þúsund evrur eða rúmar sex milljónir ísl. króna. Hugmyndin er að úr sjóðnum verði veitt vaxtalaust lán til fimm ára fyrir þá íþróttafréttamenn á Íslandi sem lenta í miklum erfiðleikum eftir atvinnumissi en sjö íþróttafréttamenn hafa misst vinnuna á undanförnum vikum. Geta þeir sótt um lán úr sjóðnum samkvæmt nánari reglugerð sem er í smíðum.
 

Á félagsfundi Samtaka íþróttafréttamanna á Ísland 11. des. sl. var þessi samhugur granna okkar þakkaður af heilum hug. Ef á þarf að halda næsta vor, þegar farið verður að reyna meira á ástandið á atvinnumarkaðnum, mun koma í ljós hvort þörf verður á slíkum sjóð.

Ísland hefur átt í farsælu samstarfi við aðrar Norðurlandaþjóðir á vettvangi íþróttafréttamennsku frá stofnun Samtaka íþróttafréttamanna hér á landi, 1956. Norðurlandaþing fara fram annað hvert ár og hafa nokkrum sinnum verið haldin hér á landi, síðast 2005.

Yfirlýsing frá KKÍ

(Des. '08) Samtökum íþróttafréttamanna hefur borist eftirfarandi bréf frá Körfuknattleikssambandi Íslands:

KKÍ styður ykkur heilshugar í þessari baráttu og vill um leið hvetja íslenskar sjónvarpsstöðvar til að auka hlutfall innlends íþróttaefnis. Það mikla forvarnargildi sem íþróttir hafa er ótvírætt og þess vegna ber að varast slíkan niðurskurð því hann mun koma einna mest niður á umfjöllun um íslenskar íþróttir.

F.h. KKÍ
Friðrik Ingi Rúnarsson
Framkvæmdastjóri

Yfirlýsing frá Samtökum íþróttafréttamanna

(Des. '08) Samtök íþróttafréttamanna lýsa yfir þungum áhyggjum sínum af uppsögnum íþróttafréttamanna að undanförnu. Samtökin skora á íslenska fjölmiðla að halda uppi öflugum fréttaflutningi af íþróttum sem og að standa vörð um beinar útsendingar af íslenskum íþróttum enda sýna fjölmiðlakannanir að slíkt efni nýtur mikilla vinsælda og hefur ótvírætt forvarnargildi. Samtökin skora á fjölmiðla að leita annarra leiða til hagræðingar en harkalegan niðurskurð á íþróttaumfjöllun. Þá er skorað á fjölmiðla að standa vörð um reynslumikla sveit íslenskra íþróttafréttamanna og að draga uppsagnir til baka.

Samþykkt á félagsfundi Samtaka íþróttafréttamanna 11. desember 2008.

Íþróttaumfjöllun í fjölmiðlum

(Des. ´08) Eftirfarandi grein ritaði Ólafur Rafnsson, forseti ÍSÍ, á heimasíðuna www.isisport.is, þann 5. desember 2008:

Íslenskir íþróttafréttamenn eru býsna merkileg stétt. Vissulega fámenn, en hefur engu að síður tekist að byggja upp magnaða flóru íþróttaumfjöllunar þar sem reynir á víðtæka og fjölbreytta þekkingu á íþróttum – sem staðist hefur býsna vel samanburð við fjölmennar og sérhæfðar íþróttadeildir erlendra fjölmiðla.

Starfsaðstæður og vinnuumhverfi íþróttafréttamanna er í senn krefjandi og ófjölskylduvænt. Þegar nú bætist við skert starfsöryggi og enn þrengri möguleikar á faglegri umfjöllun fyrir þá fáu sem enn halda starfi sínu er ljóst að hætta er á að uppbygging verðmætrar sérþekkingar fari forgörðum.

Enginn sleppur undan niðurskurði í efnahagssamdrætti. Óhjákvæmilegt er að slíkt bitni á kostnaði við umfjöllun fjölmiðla um íþróttir líkt og aðra fréttaumfjöllun. En fregnir af niðurskurði fjölmiðla benda til að of langt hafi verið gengið varðandi íþróttaumfjöllun – sem virðist víða hafa orðið harðar fyrir niðurskurði en önnur starfsemi. Slíkt er óásættanlegt og óskynsamlegt.

Íþróttaumfjöllun er líklega meðal ódýrasta fréttaefnis fjölmiðla í hlutfalli við lestur, hlustun og áhorf. Stórir íþróttaviðburðir og umfjöllun um okkar fremsta íþróttafólk er meðal vinsælasta efnis sem finnst í fjölmiðlum. Framhjá því verður ekki litið að íþróttaumfjöllun er stór hluti af daglegri fjölmiðlaneyslu mikils hluta þjóðarinnar, og hygg ég að fátt endurspegli jafn vel þverskurð almennings í landinu og áhugi á íþróttafréttum.

Íþróttaiðkun og íþróttaumfjöllun verður ekki skilin undan endurreisn samfélagsins úr rústum efnahagskreppu. Sérstaklega á það við um umfjöllun um innlendar íþróttir og íslenskt íþróttafólk.

Ég hvet fjölmiðla til að endurskoða harkalegan niðurskurð íþróttaumfjöllunar. Bæði er rétt að takmarka niðurskurð, og eins hvet ég fjölmiðla til að leita annarra leiða til hagræðingar en uppsögn dyggra starfsmanna sem búa yfir verðmætri sérþekkingu.

Niðurskurður fjölmiðla þarf að taka mið af hagsmunum neytenda.

Ólafur E. Rafnsson,
forseti ÍSÍ.
 

Áskorun framkvæmdastjórnar ÍSÍ

(Des. '08) Á Formannafundi Íþrótta- og Ólympíusambands Íslands sem haldinn var í Íþróttamiðstöðinni í Laugardal, 28. nóvember sl. lýstu formenn sérsambanda og héraðssambanda/íþróttabandalaga ÍSÍ yfir áhyggjum sínum með uppsagnir íþróttafréttamanna á Ríkisútvarpinu sem kynntar voru þann dag. Af þeim 13 starfsmönnum sem sagt var upp á fréttasviði eru sex af íþróttadeild. Frá þessu er grein á heimasíðu ÍSÍ.
Töldu fundarmenn að með þessum aðgerðum væri vegið harkalega að íþróttadeild Ríkisútvarpsins og allri umfjöllun um íþróttir.

Á fundi framkvæmdastjórnar ÍSÍ 4. desember, var eftirfarandi áskorun samþykkt:
„Framkvæmdastjórn ÍSÍ skorar á stjórn RÚV að sjá til þess að umfjöllun og fréttaflutningur af íþróttum skerðist ekki, enda er umfjöllun um íþróttir lögbundin skylda RÚV. Í gegnum árin hefur RÚV sinnt umfjöllun um íþróttir af miklum metnaði og hefur mikilvægu hlutverki að gegna við að miðla fréttum af íþróttaviðburðum, innlendum sem erlendum. Sú ráðstöfun að segja upp fjórum af sjö íþróttafréttamönnum ber ekki vott um að ætlunin sé að halda áfram á þeirri braut. Telur framkvæmdastjórn ÍSÍ að með þeim aðgerðum og aðgerðum fyrr á þessu ári sé vegið að íþróttahreyfingunni í landinu.”
 

Hetjurnar okkar - sígild bók

(Okt. '08) Sem kunnugt er gáfu SÍ út bókina Hetjurnar okkar fyrir síðustu jól þar sem fjallað er um íþróttamenn ársins frá upphafi, í tilefni 50 ára afmæli samtakanna. Þrátt fyrir mjög góða sölu eigum við til nokkuð á bókum sem seldar verða á góðu verði nú fyrir jólin og geta áhugasamir haft samband við jonkristjan@umfi.is. Hetjurnar okkur er sígild bók sem á svo sannarlega heima í öllu betri hillum landsmanna.

Fundað um kjör íþróttamanns ársins

(Okt. '08) Formaður og gjaldkeri SÍ funduðu með framkvæmdastjóra og verkefnastjóra ÍSÍ  vegna kjörsins á íþróttamanni ársins 2008. Kjörið verður með hefðbundnu sniði en reynt að leggja meira í sjónvarpsútsendinguna, í beini framhaldi af því sem gert var í fyrra. Ákveðið var að hafa þema í kringum kjörið, líkt og í fyrra en þá var það tengt Kína og fyrirhuguðum Ólympíuleikum. Kjörinu verður lýst í lok desember að þessu sinni, annað hvort mánudaginn 29. des. eða þriðjudaginn 30. des. en sjónvarpsstöðvarnar hafa lokaorðið um það.

Nýr yfirmaður íþróttadeildar RÚV

(Okt. '08) Enn eru breytingar hjá íþróttadeild Ríkisútvarpsins, sem koma til vegna breytinga á fréttastofunni en íþróttadeildin hefur verið færð frá dagskrárdeild og undir fréttastofu. Einn af aðstoðarfréttastjórunum hefur fengið íþróttadeildina inn á sitt borð en það er Margrét Marteinsdóttir. Hún er því nýr yfirmaður íþróttadeildar. Sama áhöfn verður undir stjórn nýja yfirmannsins.

Hætt við Krítarferð

(Okt. '08) Sumarskóli og haustfundur AIPS fer fram í lok október. Formaður SÍ og ritari ætluðu á þingið en vegna breyttra aðstæðna og  hörmunga á fjármálamarkaði var ákveðið að hætta við ferðina. Rétt er að taka fram að sjóður SÍ er tryggur á góðri bankabók.

Nýr íþróttafréttamaður á DV

(Okt. '08) Breytingar urðu á íþróttadeild DV. Viðar Guðjónsson er hættur en Sveinn Waage, sem hefur stýrt Golfblaðinu, er kominn í hans stað.

Formannafundur í Reykjavík

Dramatík á Opna sportpress.is mótinu í golfi

(Sept '08) Hið árlega golfmót Samtaka íþróttafréttamanna; "Opna sportpress.is mótið", var haldið á Garðavelli á Akranesi, föstudaginn 12. september. 12 íþróttafréttamenn voru skráðir til leiks, 11 mættu. Þegar golfmótið var endurvakið í fyrra mættu 7 og því er um verulega fjölgun að ræða. Til þess að fylla þrjú holl var brugðið á það ráð að fá gest, Skagamanninn Alexander Högnason. Veður var með ágætum en óhætt er að segja að skipst hafi á skin og skúrir á golfvellinum. Spilað var með Texas Scramble fyrirkomulagi og varð niðurstaðan þessi eftir flókna forgjafaútreikninga:

.

6. sæti: Ómar og Sveinn Dagur, 94 högg

5. sæti: Henry og Albert, 82

4. sæti: Skúli Unnar og Þorsteinn, 80

3. sæti: Sigurður Elvar og Guðmundur Hilmars, 75

2. sæti: Hrafnkell og Valtýr, 74

1. sæti: Eiríkur Stefán og Alexander, 74

Þar sem tvö fyrstu pörin voru jöfn gilti sú gamla og góða regla ,,betra skor á seinni 9" og þar höfðu Eiríkur Stefán og Alexander betur en Hrafnkell og Valtýr Björn urðu að sætta sig við annað sætið. Eiríkur Stefán og Alexander fengu vegleg verðlaun; gistinu á Grand Hótel, en þar sem Alexander var gestur í mótinu ákvað formaður eftir mikla íhugun að Hrafnkell og Valtýr Björn fái einnig fyrstu verðlaun, og verða þau afhent við fyrsta tækifæri.

 Mótið var frábær skemmtun en Sigurður Elvar Þórólfsson, formaður golfnefndar, hélt utan um skipulagninguna. Er gaman að sjá hversu íþróttafréttamenn eru öflugir kylfingar. Hrafnkell er t.d. einn högglengsti kylfingur landsins, Albert sá kokhraustasti, Eiríkur Stefán sá fjörugasti og Formaðurinn sá best klæddi! Sjáumst að ári.

Á myndinni eru sigurvegarnir Eiríkur Stefán og Alexander (gestaspilari) með formanninn á milli sín.

Golfmótið er föstudaginn 12. september

(Sept. '08) Hið árlega golfmót Samtaka íþróttafréttamanna ,,Opna sportpress.is mótið" verður haldið á Garðavelli á Akranesi, föstudaginn 12. september. Gjald: 0 kr.
Ræst út af 1. teig kl. 13, mæting kl. 12.45.
Eftir hringinn er boðið upp á mat og drykk. Veglegir vinningar.
Allir íþróttafréttamenn í SÍ hvattir til að mæta, sumarafleysingamenn og fyrrverandi félagar í samtökunum einnig hjartanlega velkomnir. Látið póstinn því endilega ganga til þeirra líka.

Vinsamlegast staðfestið þátttöku í síðasta lagi miðvikudaginn 10. september á netfang formanns: thorsteinn.gunnarsson@365.is

Mótið var endurvakið í fyrra eftir áratuga hvíld. Eftir flókna forgjafaútreikninga stóðu Dagur á DV og Hjalti á Fréttablaðinu uppi sem sigurvegarar.

Frábær frammistaða

(Ágúst '08) Handboltalandsliðið okkar náði stórkostlegum árangri á Ólympíuleikunum í Peking og kom heim með silfrið.
Hlutverk íþróttafréttamanna á stórleikum sem þessum er að miðla heim því sem gerist á leikunum, í gegnum sjónvarp, dagblöð, netið og útvarp. Íþróttafréttamennirnir sem voru á vettvangi í Pekíng sýndu það og sönnuðu og þeir eru frábærir fagmenn og voru stétt sinni til mikils sóma.
Hvort sem voru lýsingar, viðtöl, skrif í dagblöð eða á netið, þá skilaði það sér á eftirtektarverðan hátt til landsmanna sem nutu góðs af margra ára reynslu þeirra íþróttafréttamanna sem voru á vettvangi.
Um leið og handboltalandsliðinu er óskað til hamingju með stórkostlegan árangur, ber svo sannarlega að halda því til haga að íþróttafréttamennirnir voru einnig okkar sómi, sverð og skjöldur og eru alltaf bestir undir pressu!.
Þá sannaðist enn og aftur hversu mikilvægt það er fyrir fjölmiðla sem vilja láta taka sig alvarlega að senda íþróttafréttamenn á vettvang á stórmótum því nálgunin verður mun persónulegri og skemmtilegri. Áfram Ísland!

Íþróttafréttamenn í doktorsritgerð

(Ágúst '08) Guðmundur Sæmundsson hefur ákveðið að skrifa doktorsritgerð um málfar íþróttafréttamanna og íþróttamanna. Ætlar hann að einbeita sér að tveimur íþróttagreinum; fótbolta og frjálsum.

Guðmundur sagði í viðtali við morgunútvarp Rásar 2 að málfar íþróttafréttamanna hafi mjög mótandi áhrif á málfar íþróttamannanna sjálfra. Íþróttafréttamenn séu stýrandi í umræðunni og segir Guðmundur að Bjarni Felixson sé sitt helsta uppáhald hvað þetta varðar.

 
Guðmundur sagði íþróttafréttamenn duglega í myndlíkingum af vellinum. Þegar menn æsa sig losni svo um margar hömlur og tekst stundum að gera ótrúlegastu hluti spennandi. Málfarið hefur þróast að sögn Guðmundar en alls ekki hrakað og lýsingarnar hafa batnað.
Ritgerðin mun heita "Það er næsta víst" og þar er að sjálfsögðu vísað beint í Bjarna Fel!
 

Vösk sveit íþróttafréttamanna á Ólympíuleikunum

(Ágúst '08) Ólympíuleikarnir voru settir í dag með pompi og pragt í Pekíng í Kína.

RÚV hefur sýningarréttinn og sendir út þrjá íþróttafréttamenn; Adolf Inga Erlingsson, Hrafnkel Kristjánsson og Samúel Örn Erlingsson sem var kallaður sérstaklega í þetta verkefni. Morgunblaðið sendir Sigurð Elvar Þorólfsson. Fyrir hönd Fréttablaðsins fer Henry Birgir Gunnarsson en Stöð 2 og DV senda engan fulltrúa á leikana, sem er miður.

Alls eru 27 íslenskir íþróttamenn á ÓL að þessu sinni sem Kínverjar segja að verði þeir glæsilegustu frá upphafi.

Meistaradeildin áfram á Stöð 2 Sport

(Ágúst ´08) Stöð 2 Sport hefur tryggt sér áframhaldandi sýningarrétt á Meistaradeild Evrópu og UEFA-bikarnum til ársins 2012. Þetta er tilkynnt á heimasíðu UEFA.
Stöð 2 Sport mun halda áfram að sinna Meistaradeildinni og sýnir átta leiki í viku meðan riðlakeppnin fer fram. Þegar úrslitakeppnin hefst verða allir leikir sýndir.
Á heimasíðu UEFA er sagt að virkileg ánægja sé með þessa samninga enda hafi samstarfið við 365 miðla verið gott gegnum árin.

Fjölmiðlar hafa aðgang að þjálfurum og leikmönnum strax eftir leik

(Júlí '08) Mikils misskilnings virðist gæta hjá félögum í Landsbankadeildinni sem og Knattspyrnuþjálfarafélagi Íslands varðandi aðgang fjölmiðla að þjálfurum og leikmönnum eftir leiki í Landsbankadeild karla.
Sum félög og KÞÍ hafa fullyrt að fjölmiðlar, sem eru að keppast við klukkuna að klára umfjöllun um leiki, þurfi að bíða í 10 mínútur eftir að flautað er til leiksloka áður en þeir fá viðtöl. Þetta er kolrangt og ættu félögin í Landsbankadeildinni að vita betur því skýrt er kveðið á um þetta í handbók KSÍ sem fylgir Leyfiskerfinu.

Orðrétt segir í Leyfiskerfinu:
,,Að öllu jöfnu ættu leikmenn og þjálfarar að vera klárir í viðtöl eigi síðar en 10 mínútum eftir að leik lýkur."

Með öðrum orðum: Leikmenn og þjálfarar eiga að vera klárir í viðtöl STRAX EFTIR LEIK. 

SÍ hafa gert athugasemd við þennan misskilning félaganna til KSÍ.

Magnað heimsþing AIPS í Pekíng

(Júní '08) AIPS, Alþjóðasamtök íþróttafréttamanna, héldu sitt árlega þing, að þessu sinni í Pekíng, höfuðborg Kína, 21. - 24. maí sl. Formaður SÍ, Þorsteinn Gunnarsson, og gjaldkeri samtakanna, Jón Kristján Sigurðsson, sóttu þingið. Til Pekíng komu fulltrúar frá u.þ.b. 100 löndum en þetta var 71. heimsþing AIPS.

Að vanda voru ýmis hagsmunamál íþróttafréttamanna um alla heim rædd. En þingið bar þess merki að Ólympíuleikar eru fram undan í Pekíng. Forystumenn kínversku- og Alþjóða Ólympíuhreyfingarinnar ávörpuðu þingið en í þeirra máli kom fram að lykillinn að vel heppnuðum Ólympíuleikum sé góð þjónusta við fjölmiðla og starfsfólk þeirra þannig að leikarnir skili sér heim í stofu heimsbyggðarinnar á sem áhrifamestan hátt.

Fram kom í máli formanns kínversku Ólympíunefndarinnar að það sé ekkert einsdæmi að land eins og Kína nýti sér Ólympíuleika í einhvers konar áróðursskyni. Hvert einasta land sem haldi slíka leika nota þá til þess að auglýsa ágæti sitt og markaðssetja sem ferðamannaland í framtíðinni.

Farið var í skoðunarferð um Ólympíuþorpið meira

Undarlegur leiktími

(Júní '08) Fylkir og Grindavík mætast í Landsbankadeild karla miðvikudaginn 25. júní, kl. 21.00. Kemur það til vegna þess að þennan sama dag eru undanúrslit á EM og þetta eini leikdagurinn sem hentar Fylki vegna þátttöku í Getraunakeppni Evrópu. Leiktíminn hentar hins vegar íslensku fjölmiðlaumhverfi afar illa og hafði formaður SÍ samband við KSÍ. Sú hugmynd var uppi á borði að hafa leikinn kl. 17 en niðurstaðan varð önnur. KSÍ er hins vegar að skoða þetta mál betur eftir erindi SÍ.

Starfshópur um ábyrga framkomu aðila innan vébanda KSÍ í fjölmiðlum

(Júní '08) Stjórn KSÍ samþykkti á fundi sínum 12. júní að skipa starfshóp til þess að fjalla um ábyrga framkomu aðila innan vébanda KSÍ í fjölmiðlum. Starfshópnum er ætlað að kynna sér stöðu þessara mála í nágrannalöndum með það í huga hvort setja beri reglur um viðtöl, breyta beri refsiramma o.fl.
Í starfshópnum sitja Lúðvík S Georgsson, varaformaður KSÍ og formaður mótanefndar, Þórarinn Gunnarson formaður dómaranefndar, Stefán Geir Þórisson formaður laga- og leikreglnanefndar og Þórir Hákonarson framkvæmdastjóri KSÍ, að því er segir á heimasíðu KSÍ.
Við þetta má bæta að formaður Samtaka íþróttafréttamanna ræddi við Geir Þorsteinsson, formann KSÍ, og óskaði eftir því að samtökin kæmu að málinu ef semja eigi reglur um viðtöl og tók Geir því vel.

Breytingar á Morgunblaðinu

(Maí '08) Óvæntar breytingar urðu á íþróttadeild Morgunblaðsins þegar gerður var starfsloksamningur við Sigmund O. Steinarsson, íþróttaritstjóra blaðsins. Sigmundur (sjá mynd) hefur unnið sem íþróttafréttamaður á Morgunblaðinu í yfir tvo áratugi og sem ritstjóri í rúman áratug. Sigmundur er elsti og reyndasti íþróttafréttamaður landsins. Í hans stað hafa Víðir Sigurðsson og Sigurður Elvar Þórólfsson verið ráðnir sem íþróttaritstjórar Morgunblaðsins en þeir hafa starfað þar sem íþróttafréttamenn undanfarin ár. Víðir er með reyndustu íþróttafréttamönnum landsins

.

Viðmót og vilji til fyrirmyndar

(Maí '08) Eins og fram kemur hér fyrir neðan er aðstaða fyrir íþróttafréttamenn á nokkrum völlum ekki eins og best verður á kosið. Sérstaklega skal Kaplakrikavöllur nefndur sem og Valbjarnarvöllur en bráðabirgðaaðstaða er á báðum stöðum. Því ber að halda til haga að forráðamenn félaganna eiga hrós skilið fyrir viðtökur og viðmót þegar leitað hefur verið eftir lagfæringu á aðstöðu íþróttafréttamanna á leikjum og hefur það nánast undantekningalaust verið til mikillar fyrirmyndar. Vonandi rætist úr bráðabirgðaaðstöðu á fyrrnefndum völlum sem fyrst.

Aðstaða á að minnsta kosti þremur völlum áhyggjuefni
 

(Maí '08) Stjórn Samtaka íþróttafréttamanna hefur tekið púlsinn á þeim þremur völlum í Landsbankadeildinni í sumar sem forráðamenn KSÍ og samtakanna hafa hvað mestar áhyggjur af hvað varðar aðstöðu fyrir íþróttafréttamenn (og myndatökumenn) á leikjum í sumar, að því er fram kom á fundi með KSÍ.
Stjórn SÍ hefur heimsótt Kaplakrikavöll, Fjölnisvöll og Valbjarnarvöll í Laugardal.
Vegna framkvæmda á Kaplakrikavelli er ljóst að íþróttafréttamenn búa við bráðabirgðaaðstöðu í gámi sem er alls ekki ásættanleg. Framkvæmdastjóri FH lofar að aðstaðan verði þokkaleg á fyrsta leik.

 Á Fjölnisvelli eru framkvæmdir ekki hafnar við að byggja yfir svalir sem eru hugsaðar fyrir íþróttafréttamenn að störfum en að sögn Fjölnismanna lofa þeir að allt verði klárt í fyrsta leik gegn KR. Vonandi gengur það eftir.

Á Valbjarnarvelli er notast við gamla gáminn á Valsvelli sem er mörkum þess að vera boðlegur. Þróttarar lofa því að lagfæra aðstöðuna en ljóst að hún verður ekki nógu góð Þá er aðstaða á Fylkisvelli sem fyrr afar slæm, svo eitthvað sé nefnt.
Það breytist ekkert að rúmum 50 árum eftir stofnun Samtaka íþróttafréttamanna er okkar helsta baráttumál bætt vinnuaðstaða á íþróttaviðburðum.

Myndin er af Fjölnisvelli (www.fjolnir.is)

Ferðastyrkur til fréttaöflunar fyrir íþróttafréttamenn

(Maí '08) Formaður SÍ og framkvæmdastjóri Íslenskra getrauna hafa komist að samkomulagi um að Íslenskar getraunir styrki einn íþróttafréttamenn til þess að fara til útlanda í fréttaöflunarferð þar sem fjallað verður íþróttir sem tengjast Íslandi á einhvern hátt. Gengið verður formlega frá samningum á næstunni en búist er við að einn íþróttafréttamaður verði styrktur á ári en samningurinn er til þriggja ára. Reglugerðin sem fylgir samkomulaginu verður kynnt síðar sem og samningurinn sjálfur sem hefur verið nokkuð lengi í bígerð.

Gagnlegt Stefnumót við KSÍ

(Maí '08) Samtök íþróttafréttamanna buðu KSÍ á stefnumót þann 5. maí. Þórir Hákonarson, framkvæmdastjóri KSÍ og Ómar Smárason, leyfisstjóri KSÍ, mættu fyrir hönd KSÍ en Geir Þorsteinsson formaður forfallaðist á síðustu stundu.
Þórir fór yfir knattspyrnusumarið og í kjölfarið voru fyrirspurnir. Íþróttafréttamann hafa töluverðar áhyggjur af aðstöðuleysi á sumum völlum í Landsbankadeildinni í sumar, sérstaklega hjá nýliðum Fjölnis og Þróttar sem og hjá FH en þar eru miklar framkvæmdir í gangi á vallarsvæðinu. Auk þess er aðstaða á Fylkisvelli afar slæm. Íþróttafréttamenn hafa lengi barist fyrir bættri aðstöðu til þess að geta sinnt starfi sínu sómasamlega, sem og myndatökumenn fyrir sjónvarpsstöðvarnar en aðstaða þeirra hefur einnig verið bágborin á sumum völlum.
Þórir og Ómar tóku ábendingum vel um það sem betur mætti fara og verður því komið á framfæri við félögin. Jafnframt munu SÍ og KSÍ senda í sameiningu frá sér GÁTLISTA til félaganna, líkt og SÍ gerði í fyrra, til þess að auðvelda félögunum undirbúninginn fyrir sumarið.
SÍ þakkar KSÍ fyrir gagnlegt stefnumót.

Á myndinni eru Þórir Hákonarson, framkvæmdstjóri KSÍ (sitjandi) og Ómar Smárason, leyfis- og markaðsstjóri KSÍ, á fundinum með íþróttafréttamönnum.

Breytingar hjá DV

(Maí '08) DV hyggst leggja niður íþróttakálf sinn sem fylgt hefur blaðinu undanfarin misseri en þar hafa þrír íþróttafréttamenn unnið í fullu starfi og haldið úti myndarlegu blaði. Í staðinn verða tveir íþróttafréttamenn færðir yfir á dv.is og sjá þar um íþróttaskrif og einn fer yfir í almennar fréttir. Verður mikil eftirsjá í íþróttakálfi DV, ekki síst um helgar þar sem mátti lesa mörg skemmtileg og ítarleg viðtöl við íþróttafólk - og jafnvel íþróttafréttamenn. Einnig var ítarleg umfjöllun um enska boltann á mánudögum sem var geysi vinsæl. DV verður ekki samt eftir þessar breytingar.

Ljósmyndir óskast!

(Apríl '08) Þeir félagar í Samtökum íþróttafréttamanna sem vilja hafa mynd af sér í AIPS skírteini, eru vinsamlegast beðnir um að senda til formanns sem allra fyrst. Netfangið er thorsteinn.gunnarsson@365.is.

Félagar eru hvattir til að senda mynd því skírteinið er óneitanlega trúverðugra með fallegri brosmynd.
 

Stefnumót KSÍ mánudaginn 5. maí

(Apríl '08) Formaður og framkvæmdastjóri KSÍ ætla að hitta félaga í Samtökum íþróttafréttamanna mánudaginn 5. maí nk. kl. 17 í höfuðstöðvum KSÍ. Þeir munu flytja framsögu um knattspyrnusumarið og svara svo spurningum félagsmanna. Matur og veitingar á boðstólum. Félagar í SÍ hvattir til að fjölmenna svo við fáum líflega og skemmtilega umræðu.
 

Frestun á Stefnumóti við KSÍ

(Apríl '08) Því miður verður að fresta Stefnumóti við KSÍ sem fyrirhugað var á föstudaginn, 25. apríl. Unnið er að því að finna nýja dagsetningu.
 

Henry Birgir tekur við af Valtý Birni

(Apríl '08) Henry Birgir Gunnarsson, fréttastjóri íþróttadeildar Fréttablaðsins, mun frá með 2. maí vera með útvarpsþátt á Xinu 977 frá kl. 12-13. Kemur hann í staðinn fyrir Valtýr Björn Valtýsson sem hefur flutt sig yfir á RÚV.

Valtýr Björn á RÚV

(Mars '08) Valtýr Björn Valtýsson íþróttafréttamaður mun færa sig um set innan skamms og hefja störf sem íþróttafréttamaður hjá Ríkissjónvarpinu. Valtýr Björn hefur lengst af starfað hjá 365-miðlum, bæði í sjónvarpi og útvarpi, nú síðast sem dagskrárgerðamaður á útvarpssviði.

Óánægja með leiktíma í N1 deild karla

(Mars '08) Stjórn Samtaka íþróttafréttamanna sendi í dag, 11. mars, eftirfarandi bréf til HSÍ:

Stjórn Samtaka íþróttafréttamanna hefur fundið fyrir megnri óánægju á meðal félagsmanna með leiktíma í N1 deild karla. Sífellt fleiri lið hafa fært leiki sína frá kl. 19.15 til 20 og nk. fimmtudag er viðureign Fram og Vals kl. 20.30.

Að hafa leikina svona seint að kvöldi gerir fjölmiðlum ákaflega erfitt fyrir að fjalla um leikina, hvort sem um prent- eða ljósvakamiðla er að ræða. Í knattspyrnunni og körfuboltanum er megin reglan sú að hafa leikina kl. 19.15 sem er sá tími sem hentar íslensku fjölmiðlaumhverfi hvað best, og í raun ekki síður íslenskum áhorfendum og gerir íþróttina fjölskylduvænni fyrir vikið.

Stjórn Samtaka íþróttafréttamanna skorar á HSÍ að breyta leiktímum þannig í N1 deild karla að allir leikir hefjist kl. 19.15.

Með vinsemd og virðingu,

F.h. stjórnar Samtaka íþróttafréttamanna
Þorsteinn Gunnarsson, formaður

Stefnumót við KSÍ

föstudaginn 25. apríl

(Mars '08) Stjórn SÍ hefur ákveðið að bjóða félagsmönnum að fara á stefnumót við aðila innan íþróttahreyfingarinnar amk. einu sinni á önn.

Við hæfi er að byrja á stærsta sérsambandinu, KSÍ. Formaður og framkvæmdastjóri KSÍ hafa samþykkt að eiga stefnumót við SÍ föstudaginn 25. apríl (ATH! Breyting - er viku síðar en áður auglýst) kl. 20, fundarsalur auglýstur síðar. Þar mun KSÍ kynna fótboltasumarið 2008 og svara spurningum sem brenna á íþróttafréttamönnum þessa dagana og er væntanlega af nógu að taka, eins og t.d. varðandi aðstöðu á Laugardalsvelli o.fl. Vonandi mæta sem flestir félagsmenn SÍ á þetta stefnumót. Nánar síðar.

Aðalfundur SÍ fyrir árið 2007

(Feb. '08) Aðalfundur SÍ fyrir árið 2007 var haldinn 28. febrúar. Virkilega góð mæting var á fundinn en alls mætti 21 félagi af 29. Tveir nýir félagar gengu í samtökin, Snorri Sturluson af RÚV og Tómas Þór Þórðarson af DV.

Þorsteinn Gunnarsson, formaður SÍ, flutti skýrslu stjórnar en síðasta ár var ansi viðburðarríkt. Hæst bar að sjálfsögðu kjörið á íþróttamanni ársins en SÍ stóð fyrir því þrekvirki að gefa út bókina Hetjurnar okkar - saga íþróttamanns ársins í 50 ár. Að ýmsum öðrum málum má nefna baráttu fyrir bættri aðstöðu íþróttafréttamanna á Laugardalsvelli og fleiri leikvöngum, samskiptum við KSÍ, Norðurlandaþingi og AIPS þingi, ráðstefnuna Play the game, svo eitthvað sé nefnt.

Jón Kristján Sigurðsson gjaldkeri lagði fram ársreikninga. Hagnaður síðasta árs var um 890 þúsund krónur en rekstrartekjur voru um 2,2 milljónir en umfangið í fyrra var óvenju mikið vegna bókaútgáfunnar.

Ein breytingatillaga um reglugerð á íþróttamanni ársins lá fyrir fundinum þess efnis að kjörið væri ekki leynilegt en hún var felld eftir nokkrar umræður.

Stjórn SÍ var endurkjörin. Þorsteinn Gunnarsson verður áfram formaður, Jón Kristján Sigurðsson gjaldkeri og Guðmundur Hilmarsson ritari.  Í varastjórn eru Eiríkur Stefán Ásgeirsson og Viðar Guðjónsson.

Undir liðnum önnur mál bar ýmislegt á góma en framundan er skemmtilegt íþróttaár.

Aðalfundur SÍ í fundarsal UMFÍ

(Febr. ´08) Aðalfundur Samtaka íþróttafréttamanna fyrir árið 2007 verður haldinn fimmtudaginn 28. febrúar nk. kl. 14 (klukkan tvö) í fundarsal UMFÍ við Laugarveg. Fundarsalurinn er á þriðju hæð.
Dagskrá: Venjuleg aðalfundarstörf, samkvæmt lögum félagsins.

Our Heroes

(Febr. 08) Alþjóðasamtök íþróttafréttamanna, AIPS, gefa út tímarit fjórum sinnum á ári. Það er sent til félagsmanna um allan heim. SÍ hafa sent pistla í þetta ágæta tímarit undanfarin misseri. Í nýjasta tímaritinu, því fjórða og síðasta sem kom út í lok síðasta árs en barst félagsmönnum í febrúar, er pistill um bókina góðu, Hetjurnar okkar, eða 'Our Heroes' eins og hún er nefnd upp á enska tungu en pistillinn er undir fyrirsögninni 'Sports heroes?

 Einnig er hægt að nálgast tímaritið á heimasíðu AIPS: http://www.aipsmedia.com/downloadpdf.php?PHPSESSID=fdb3021b86b989669db1957378386443&issue=2007,4

Aðalfundur SÍ fimmtudaginn 28. febrúar

(Febr. ´08) Aðalfundur Samtaka íþróttafréttamanna fyrir árið 2007 verður haldinn fimmtudaginn 28. febrúar nk. kl. 14 (klukkan tvö). Fundarstaður auglýstur síðar.
Dagskrá: Venjuleg aðalfundarstörf, samkvæmt lögum félagsins:
I. Inntaka nýrra félaga
II. Kosning fundarstjóra og fundarritara.
III. Skýrsla stjórnar og reikningar lagðir fram.
IV. Lagabreytingar.
V. Stjórnarkosning.
VI. Árgjald félagsmanna.
VII. Önnur mál.
VIII. Fundargerð lesin upp, fundarslit.
 

Félagar skrái sig á heimasíðu AIPS

(Jan. 08) Athygli er vakin á því að Alþjóðasamtök íþróttafréttamanna, AIPS, eru loksins komin með netskráningu. Félagar í SÍ er hvattir til að fara inn á heimasíðu AIPS, www.aipsmedia.com, til að skrá sig til að fá sent AIPS kort fyrir næstu tvö árin. 

Hægra megin á heimasíðunni er hnappur merktur AIPS CARD og þið skráið inn AIPS kortanúmerið ykkar og fæðingardag og uppfærið upplýsingarnar. Endilega sendið mynd af ykkur líka.

Þeir sem eru nýir (eða hafa týnt kortinu sínu) smelli neðst á GET A NEW CARD. Félagar í SÍ eru vinsamlegast beðnir að skrá sig sem allra fyrst.

Geir hættir - Snorri tekur við

(Jan. 08) Geir Magnússon lætur af störfum um mánaðarmótin sem íþróttafréttamaður hjá RÚV. Geir hefur starfað þar síðan sumarið 1997 en hann hefur starfað í faginu í um 15 ár en hann var áður hjá Stöð 2 og Sýn. Staðfest er að Snorri Sturluson hefur verið ráðinn í stað Geirs. Snorri er að góðu kunnur sem íþróttafréttamaður á Sýn og Stöð 2 á sínum tíma, auk fleiri fjölmiðla. Nú síðast starfaði hann sem ráðgjafi hjá KOM-almannatengslum.
 

Federer bestur þriðja árið í röð

(Jan. '08) Svissneski tenniskappinn Roger Federer hefur verið kjörinn besti íþróttamaður heims af Alþjóðasamtökum íþróttafréttamanna (AIPS) og er þetta þriðja árið í röð sem hann er kjörinn.
Besta íþróttakona heims að mati AIPS er belgíska tenniskonan Justine Henin og AC Milan er besta lið ársins. Alls eru það íþróttafréttamenn frá 94 löndum sem þátt taka í kjörinu.
Knattspyrnukappinn Kaká hjá AC Milan varð í öðru sæti á eftir Federer og hinn sprettharði Asafa Powell frá Jamaíku varð þriðji.
Hjá konunum komu tvær frjálsíþróttakonur á eftir Henin. Sænska sjöþrautarkonan Carolina Klüft varð önnur og Blaka Vlasic frá Króatíu þriðja. (mbl.is)

Margrét Lára kjörin íþróttamaður ársins 2007

Tíu efstu í kjöri íþróttamanns ársins 2007

(24. des. '07) Atkvæði í kjöri Samtaka íþróttafréttamanna um Íþróttamann ársins 2007 hafa verið talin og liggur ljóst fyrir hvaða tíu íþróttamenn urðu í efstu sætum í kjörinu.

Nöfn þeirra í stafrófsröð eru:

Birgir Leifur Hafþórsson kylfingur úr GKG
Eiður Smári Guðjohnsen knattspyrnumaður hjá Barcelona
Guðjón Valur Sigurðsson handknattleiksmaður hjá Gummersbach
Jón Arnór Stefánsson körfuknattleikismaður hjá Lottomatica Roma
Margrét Lára Viðarsdóttir knattspyrnukona hjá Val
Ólafur Stefánsson handknattleiksmaður hjá Ciudad Real
Ragna Ingólfsdóttir badmintonkona úr TBR
Ragnheiður Ragnarsdóttir sundkona úr KR
Snorri Steinn Guðjónsson handknattleiksmaður úr GOG
Örn Arnarson sundmaður úr SH

29 félagsmenn eru í Samtökum íþróttafréttamanna og nýttu allir þeirra atkvæðisrétt sinn í kjörinu að þessu sinni. Atkvæðagreiðslan er leynileg og fer þannig fram að hver félagsmaður SÍ setur saman lista með nöfnum tíu íþróttamanna sem honum þykja hafa skarað fram úr á árinu.
Helstu styrktaraðilar Samtaka íþróttafréttamanna vegna kjörsins eru Glitnir og Icelandair.
Kjörinu verður lýst á Grand Hótel Reykjavík föstudaginn 28. desember klukkan 19.35 og eins og undanfarin ár verður það sent út í sameiginlegri beinni útsendingu á RÚV og Sýn.
Áður en kjöri íþróttamanns ársins verður lýst mun ÍSÍ afhenda viðurkenningar til þeirra íþróttakarla og -kvenna hjá sérsamböndum sínum sem þótt hafa skarað fram úr á árinu 2007. Þetta verður í þrettánda sinn sem Samtök íþróttafréttamanna og ÍSÍ standa að sameiginlegri hátíð sem nær hápunkti þegar Íþróttamaður ársins 2007 verður útnefndur.

Samtök íþróttafréttamanna óska landsmönnum gleðilegra jóla og farsæls komandi árs.

Kjörið á íþróttamanni ársins 28. desember

(Des. '07) Kjörið á íþróttamanni ársins 2007 fer fram föstudaginn 28. desember nk. Að vanda verður það í samstarfi við ÍSÍ. Bein útsending í Ríkissjónvarpinu og á Sýn hefst kl. 19.35. Nöfn þeirra tíu stigahæstu í kjörinu verða birt á aðfangadag, 24. desember.  Nánari upplýsingar síðar.

Met fjöldi félaga í SÍ = 29

(Des. '07) Á félagsfundi SÍ 14. des. sl. fjölgaði um nokkra íþróttafréttamenn. Alls eru 29 íþróttafréttamenn (í fullu starfi) meðlimir í Samtökum íþróttafréttamanna og hafa þeir aldrei verið fleiri. Þá er einn svokallaður aukameðlimur. Nokkur stöðugildi hafa bæst við, aðallega hjá 365-miðlum. Er ánægjulegt til þess að vita að fjölmiðlar eru farnir að átta sig á mikilvægi þess að ráða fagmenn í fullt starf á sínum miðlum þegar kemur að því að fjalla um íþróttir.

Hetjurnar okkar í Bónus, Hagkaupum og Office 1

(Des. '07) Bókin Hetjurnar okkar - íþróttamenn ársins í hálfa öld, sem Samtök íþróttafréttamanna gefa út, er til sölu í verslunum Bónus, Haugkaupa og Office 1. Á landsbyggðinni er hægt að kaupa bókina í verslunum Office 1 (Vestmannaeyjar, Ísafjörður, Akureyri og Egilsstaðir). Þeir sem vilja panta eintak geta líka sent tölvupóst á netfangið mariner@internet.is

Menntamálaráðherra fékk fyrsta eintakið

(13. des. '07) Í dag héldu Samtök íþróttafréttamanna fréttamannafund í höfuðstöðvum ÍSÍ. Tilefnið var útgáfa bókarinnar Hetjurnar okkar - íþróttamenn ársins í hálfa öld.

Þorgerður Katrín Gunnarsdóttir mennta- og íþróttamálaráðherra, tók við fyrsta eintakinu af bókinni úr hendi höfundarins, Hallgríms Indriðasonar. Þorgerður Katrín flutti ávarp þar sem hún hvatti íþróttafréttamenn að gæta vel kjörsins um íþróttamann ársins.
Hallgrímur las einnig upp úr bókinni kaflann um Guðmund Hermannsson, íþróttamann ársins 1967.
Nokkrir af íþróttamönnum ársins mættu af þessu tilefni og fengu þeir afhentar bækur. Þá heiðruðu SÍ Stefán Konráðsson, fyrrum framkvæmdastjóra ÍSÍ, með gullmerki samtakanna fyrir einstakt   meira

HETJURNAR OKKAR kemur út þriðjudaginn 11. desember

(Des. 07) Bókin HETJURNAR OKKAR - ÍÞRÓTTAMENN ÁRSINS Í HÁLFA ÖLD, eftir Hallgrím Indriðason sem Samtök íþróttafréttamanna gefa út, fer í dreifingu þriðjudaginn 11. desember. Nokkur töf varð í prentun en við því er lítið að gera. Gríðarlegur áhugi er fyrir þessari mögnuðu bók og hafa þegar verið pöntuð 200 eintök fyrirfram.
Samtök íþróttafréttamanna blása til fréttamannafundur fimmtudaginn 13. desember kl. 12 þar sem bókin verður kynnt með pompi og pragt. Í beinu framhaldi af fréttamannafundinum verður fundur í SÍ um kjör íþróttamanns ársins 2007.
 

Formannafundur í Osló

(Nóv. 07) Þriðjudaginn 27. nóvember var haldinn árlegur formannafundur hjá samtökum íþróttafréttamanna á Norðurlöndunum, að þessu sinni í Osló. Formenn Íslands, Noregs, Svíþjóðar, Danmerkur og Finnlands mættu til þess að bera saman bækur sínar og fara yfir ýmis málefni sem snúa að íþróttafréttamönnum á Norðurlöndunum.

Hvert og og eitt land fór yfir starfsemi í sínu félagi og þau ýmsu mál sem þarf að takast á við í dagsins önn og var ótrúlegt hversu svipuð mál koma upp á borðið. Á öllum Norðurlöndunum er þetta sífelld barátta um bættari og betri aðstöðu fyrir íþróttafréttamenn í stærstu greinunum. Öll samtökin, nema þau dönsku, standa fyrir vali á íþróttamanni ársins. Dönsku samtökin meira

Dagur Sveinn til KSÍ
 

(Nóv. '07) Knattspyrnusamband Íslands hefur ráðið Dag Svein Dagbjartsson sem starfsmann í fræðslumál. Dagur hefur lokið B.S. gráðu í íþróttafræðum frá KHÍ Laugarvatni og á að baki 12 landsleiki fyrir U-17 ára landslið Íslands. Dagur Sveinn hefur að auki starfað sem íþróttafréttamaður á Fréttablaðinu og á DV. Hann mun hefja störf fyrir KSÍ þann 1.janúar 2008.
Dagur Sveinn mun verða Sigurði Ragnari Eyjólfssyni fræðslustjóra KSÍ til aðstoðar og mun fræðslustarf KSÍ eflast enn frekar fyrir vikið, samkvæmt heimasíðu KSÍ.
 

Nokkrar íþróttabækur í jólaflóðinu

(Nóv. 07) Nokkrar íþróttabækur eru gefnar út fyrir þessi jól sem vert er að gefa gaum og sagt er frá í Bókatíðindum:

Hæst ber bókin HETJURNAR OKKAR - ÍÞRÓTTAMENN ÁRSINS Í HÁLFA ÖLD, sem Samtök íþróttafréttamanna gefa út. Mjög er vandað til verka í þessari bók sem er einstök heimild um þetta afreksíþróttafólk. Nánar um þessa bók síðar sem fer í prentun nú í vikunni og verður kynnt með pompi og pragt. Höfundur er Hallgrímur Indriðason.

ÍSLENSK KNATTSPYRNA eftir Víði Sigurðsson íþróttafréttamann er auðvitað Biblía allra knattspyrnuáhugamanna á Íslandi og ómissandi um hver jól til að rifja knattspyrnuárið upp. Ómetanleg heimild.

SÁ BESTI fjallar um Cristiano Ronaldo meira

Evrópusamtökin opna skrifstofu í Brüssel

(Nóv. 07) Evrópusamtök íþróttafréttamanna, UEPS, fengu skrifstofuaðstöðu í nýjum húsakynnum hjá Samtökum íþróttafréttamanna í Brüssel nú í byrjun nóvember. UEPS er þar ekki með fastan starfsmann en ákveðið var á mjög umdeildu þingi í vor (sem var hluti af heimsþingi AIPS) að færa aðsetur samtakanna til Brüssel til að geta skráð samtökin formlega innan Evrópusambandsins og gert þau sýnilegri og fengið öll tilskilin réttindi. Sjá nánar á heimasíðu samtakanna: www.ueps-media.com

Vel heppnuð ráðstefna
 

(Okt. 07) Ráðstefnunni Spilum leikinn, eða Play the game, lauk í kvöld á Grandhótel með glæsilegu hlaðborði. Óhætt er að segja að ráðstefnan hafi takist í alla staði mjög vel, haldin voru mörg athyglisverð erindi um dekkri hliðar íþróttanna og má í því sambandi nefna lyfjanotkun í íþróttum, ýmis spillingamál, fjárhagsvandræði enska boltans o.fl. Gestir á ráðstefnunni komu frá 50 löndum.
Heiðursverðlaun Play the game að þessu sinni fékk Sandro Donati frá Ítalíu en hann hefur verið í fararbroddi þar í landi að berjast gegn lyfjamisnotkun í íþróttum.
UMFÍ var gestgjafi ráðstefnunnar og var öll umgjörð til sóma. Nánar er hægt að fræðast um hin ýmsu erindi og umræður ráðstefnunnar á heimasíðu hennar; playthegame.org

PLAY THE GAME HEFST Á SUNNUDAGINN
 

(Okt. '07) Ráðstefnan Play the game hefst á sunnudaginn, 28. október, og því fer hver að verða síðastu að skrá sig.
Ég vil endilega hvetja ykkur til að skoða það sem er á boðstólum. Hér er samantekt á því:

http://www.playthegame.org/upload/documents/playthegameconferenceprogramme.pdf

Þarna eru margir áhugaverðir fyrirlesarar og svo eru umræður og fyrirspurnir eftir hvern fyrirlestur ásamt því sem nefnist Workshop.

Dæmi: Á sunnudagskvöldið er áhugavert málþing um ENSKA BOLTANN, sem ber yfirskriftina: AÐEINS FYRIR MILLJARÐAMÆRINGA? Á meðal fyrirlesara eru Shaka Hislop, fyrrverandi markvörður West Ham o.fl. liða.

Á mánudagsmorgun er fjallað um stórviðburði í íþróttum eins og meira

Tilboðsverð fyrir Íslendinga sem taka þátt í Play the Game

(Okt. '07) Eins og áður hefur komið fram verður Play the Game ráðstefnan haldin á Grand Hótel í Reykjavík dagana 28. október til 1. nóvember.Ráðstefnan er einn liður í 100 ára afmæli UMFÍ. Congress Reykjavík hefur haft veg og vanda að undirbúningi ráðstefnunnar í samvinnu við forsvarsmenn Play the Game og UMFÍ en Samtök íþróttafréttamanna koma einnig að undirbúningi hennar.

Langflestir þátttakendur á ráðstefnuna koma erlendis frá og kaupa þá ákveðinn pakka sem inniheldur þátttökugjald og gistingu. Nú hefur verið ákveðið og koma til móts við Íslendinga sem hafa áhuga á að sækja ráðstefnuna. Athygli er vakin á því að Blaðannafélag Íslands greiðir pakkann fyrir íslenska þátttakendur.

Verð sem í boði eru gilda fyrir þá daga sem þátttakendur sitja ráðstefnuna:  meira

Athyglisverð rannsókn á íslenskum dagblöðum

(Okt. 07) ÍSÍ bauð upp á hádegisfund  þar sem Anna Guðrún Steindórsdóttir kynnti niðurstöður BS ritgerðar sinnar frá íþróttavali KHÍ síðastliðið vor um íþróttafréttir í dagblöðum.
Líklegt má telja að rannsókn Önnu Guðrúnar sé sú umfangsmesta og marktækasta sem gerð hefur verið hingað til enda spannar rannsóknin allt árið 2006.
Ólafur Rafnsson forseti ÍSÍ stýrði fundinum og umræðum í kjölfar fyrirlestursins. 
Niðurstöður eru um margt athyglisverðar og má nú finna glærur frá fyrirlestrinum á heimasíðu ÍSÍ. 

KR fær viðurkenningu SÍ fyrir bestu fjölmiðlaaðstöðuna boltasumarið 2007

(Sept. 07) Samtök íþróttafréttamanna ákváðu í vor að verðlauna það lið sem stæði sig best hvað varðar  aðbúnað og vinnuaðstöðu fyrir íþróttafréttamenn boltasumarið 2007.  Ljóst er að mörg félög standa sig með mikilli prýði í þessum efnum en hjá nokkrum félögum er pottur brotinn.

KR-ingar fengu flest atkvæði í kosningu íþróttafréttamanna að þessu sinni um bestu fjölmiðlaaðstöðuna. Þorsteinn Gunnarsson, formaður Samtaka íþróttafréttamanna, afhenti Páli Sævar Guðjónssyni, fjölmiðlafulltrúa og vallarþuli KR-inga, verðlaunaskjöld frá SÍ. Páll Sævar sagði við þetta tilefni að hann líti á þetta sem mikla viðurkenningu fyrir KR-inga sem hefðu ávallt lagt sig fram um að búa sem best að íþróttafréttamönnum. „Mjörg margir sjálfboðaliðar í KR koma að þeirri miklu vinnu að undirbúa heimaleikina og þetta er viðurkenning til okkar allra,“ sagði Páll.

ÍA varð í 2. sæti í kjörinu en þessi tvö félög skáru sig nokkuð úr. meira

Úttekt á fjölmiðlaaðstöðu í Kópavogi og í Mýrinni

(Sept. 07) Í kjölfar umræðu um bága aðstöðu íþróttafréttamanna á Laugardalsvelli fyrir skömmu hafði Þór Jónsson, forstöðumaður almannatengsla hjá Kópavogsbæ, samband við formann SÍ og óskaði eftir því að hann tæki út aðstöðu íþróttafréttamanna í nýrri stúkubyggingu á Kópavogsvelli og í nýju knattspyrnuhúsi í Kópavogi sem fengið hefur nafnið Kórinn og er í Vatnsendahverfi.
Formaður SÍ kom með nokkrar ábendingar um það sem mætti lagfæra, sérstaklega í Kórnum. Kópavogsbær á hrós skilið fyrir að hafa frumkvæði að því vilja hafa aðstöðu íþróttafréttamanna sem allra besta, einnig hefur verið vel hugsað fyrir myndatökumönnum á þessum stöðum.
Þá var einnig óskað eftir því að formaður SÍ færi í Mýrina, nýja handboltahöll í Garðabæ, til að koma með tillögur um betri aðstöðu fyrir íþróttafréttamenn en þar gleymdist að taka slíkt með í reikninginn við hönnun hússins. Um bráðabirgðaaðstöðu verður að ræða fram að áramótum í Mýrinni en hugmyndir um framtíðarlausn eru komnar á koppinn. Frumkvæði Stjörnumanna er einnig fagnað.
 

Ásgeir fallinn frá

(Sept. '07) Ásgeir Elíasson, fyrrverandi landsliðsþjálfari í knattspyrnu, lést þann 9. september sl. Íþróttafréttamenn áttu ávallt fyrirmyndar samstarf við Ásgeir en hann var einn af bestu sonum íslenskrar knattspyrnu. Samtök íþróttafréttamanna senda innilegar samúðarkveðjur til fjölskyldu Ásgeirs. Samtökin minntust Ásgeirs með því að senda blómsveig við útför hans.

Sameiginleg yfirlýsing KSÍ og SÍ

(Sept. ´07) Í kjölfar undangenginnar umræðu um aðstöðu íþróttafréttamanna á Laugardalsvelli s.l. laugardag vilja KSÍ og SÍ koma eftirfarandi á framfæri.

KSÍ hefur ekki að öllu leyti lokið framkvæmdum við aðstöðu fréttamanna á Laugardalsvelli og harmar að aðstæður íþróttafréttamanna voru ekki eins og best verður á kosið en unnið verður að frekari endurbótum á næstunni. Þegar hafa verið gerðar ráðstafanir til þess að úr aðstöðu verði bætt eftir kostum fyrir leik Íslands og Norður Írlands síðar í dag.
KSÍ og SÍ munu taka upp viðræður í framhaldinu um aðstöðu íþróttafréttamanna.

Þórir Hákonarson, framkvæmdastjóri KSÍ

Þorsteinn Gunnarsson, formaður Samtaka íþróttafréttamanna.

Svar KSÍ: Óska eftir fundi!

(Sept. 07) Kl. 13.59 barst SÍ svar frá KSÍ vegna bréfs samtakanna um aðstöðuleysi á Laugardalsvelli:

Heill og sæll Þorsteinn.
Undirritaður óskar eftir fundi með formanni/fulltrúum stjórnar Samtaka íþróttafréttamanna vegna þessa máls. Þriðjudagur 11. september eftir hádegi hentar mér.
Bestu kveðjur
Þórir Hákonarson
Framkvæmdastjóri KSÍ

Formaður SÍ sendi framkvæmdastjóra KSÍ eftirfarandi bréf í kjölfarið:

Sæll og blessaður Þórir.
Það eru okkur í Samtökum íþróttafréttamanna gríðarleg vonbrigði að KSÍ geti ekki svarað bréfi okkar efnislega eins og um var beðið, hvað þá að biðjast afsökunar á þeirri aðstöðu sem boðið var upp á á Laugardalsvelli sl. laugardag. Það sýnir enn og aftur virðingarleysi fyrir okkar starfi.
Vonandi fást einhver svör á fundi með framkvæmdastjóra KSÍ.
Virðingarfyllst,
Þorsteinn Gunnarsson
 

Harðort bréf til KSÍ vegna aðstöðuleysis á Laugardalsvelli

(Sept. ´07) Eftir landsleik Íslands og Spánar á Laugardalsvelli var íslenskum íþróttafréttamönnum nóg boðið vegna aðstöðuleysis og var eftirfarandi bréf sent til KSÍ:

KSÍ

Bt. Geirs Þorsteinssonar formanns, Þóris Hákonarsonar framkvæmdastjóra, starfsfólks KSÍ, vallarstjóra og stjórnarmanna KSÍ.

Íslenskir íþróttafréttamann hafa ýmislegt látið yfir sig ganga í gegnum tíðina hvað varðar aðstöðu á knattspyrnuleikjum. En nú er mælirinn fullur. Á nýuppgerðum þjóðarleikvanginum var íslenskum íþróttafréttamönnum sýnd þvílík vanvirðing á landsleik Íslands og Spánar í gær að elstu menn í þessu fagi muna ekki eftir öðru eins.

Vinnuaðstaða íslenskra íþróttafréttamanna á leiknum var til háborinnar skammar því það rigndi á tölvur og skrifblokkir. Þá var engin gæsla á okkar vinnusvæði. Fólk ráfaði þarna um ölvað og að leik loknum var ekki vinnufriður. Verst af öllu var að enginn hjá KSÍ sem rætt var við á leiknum í gær sýndi vilja til þess að bæta úr málinu eða vera okkur innan handar, sem endurspeglar virðingarleysið fyrir okkar starfi.

Undirritaður ásamt öðrum stjórnarmönnum í Samtökum íþróttafréttamanna mætti á fund fyrir einu og hálfu ári hjá þáverandi framkvæmdastjóra KSÍ. Þar var fullyrt að við þyrftum engar áhyggjur að hafa, við hefðum aðstöðu innandyra á landsleikjum í framtíðinni. Þessi loforð voru svikin á Laugardalsvelli í gær.

Samtök íþróttafréttamanna hafa einnig kvartað yfir aðstöðuleysi við KSÍ við önnur tækifæri en því miður hefur því oftar en ekki verið svarað með tómlæti eða útúrsnúningum fram að þessu.

Samtök íþróttafréttamanna krefjast þess að KSÍ biðji félagsmenn okkar afsökunar á þeirri aðstöðu sem boðið var upp á í gær og að KSÍ bæti snarlega úr vinnuaðstöðu fyrir íþróttafréttamenn á landsleikjum í framtíðinni. Að auki viljum við fá svar við eftirfarandi spurningum:

1. Hvers vegna var okkur boðið upp á þessa óásættanlegu aðstöðu?
2. Hvers vegna voru starfsmenn KSÍ víðs fjarri meðan á leik stóð?
3. Hvers vegna var engin gæsla þarna í kring?
4. Er það ásetningur KSÍ að losna við íslenska íþróttafréttamenn af landsleikjum á Laugardalsvelli?
5. Hvers konar aðstöðu verður okkur boðið upp á þegar Ísland mætir Norður-Írlandi á Laugardalsvelli á miðvikudaginn?

Svar óskast í síðasta lagi mánudaginn 10. september nk. kl. 14.

F.h. Samtaka íþróttafréttamanna

Þorsteinn Gunnarsson, formaður

Fréttamannafundur Play the game á Grand Hótel

(Sept. 07) Forsvarsmenn Play The Game ráðstefnunnar, sem haldin verður í Reykjavík dagana 28. október til 1. nóvember, efndu í gær til blaðamannafundar á Grand Hótel. Jens Sejer Andersen, framkvæmdastjóri Play The Game, sagði frá undirbúningi ráðstefnunnar sem miðar vel áfram. Í máli hans kom fram að búist er við um 300 þátttakendum erlendis frá en dagskrá ráðstefnunnar er mjög áhugaverð en þekktir fyrirlesarar koma til landsins.

Björn B. Jónsson, formaður UMFÍ, sagði í stuttu ávarpi að ráðstefnan væri mjög spennandi verkefni en hún væri einn liður í dagskrá hreyfingarinnar sem fagnaði 100 ára afmæli á þessu ári.  Sjá nánar um ráðstefnuna í fleiri fréttum hér neðar á síðunni en Samtök íþróttafréttamanna eru aðili að henni.

Á myndinni má sjá Þorstein Gunnarsson, formann SÍ og Jens Sejer Andersen, framkvæmdastjóra Play The Game,  bera saman bækur sínar.

Ekki aukarás fyrir íþróttir á RÚV?

(Sept. ´07) Í frétt í Morgunblaðinu í dag. 7. sept., segist Páll Magnússon útvarpsstjóri ekki gera ráð fyrir því að sett verði sérstök íþróttarás á laggirnar á RÚV. Í Morgunblaðinu segir Páll:

"Það eru ekki uppi fyrirætlanir um það að stofna sérstaka íþróttarás, enda samræmist það ekki hlutverki Ríkisútvarpsins. En núna erum við að vinna að framtíðardreifikerfi sjónvarpsins sem verður á stafrænu formi og þá höfum við möguleika á því að grípa til sérstakrar hliðarrásar þar sem við gætum sýnt atburði af þessu tagi án þess að raska hefðbundinni dagskrá. Á næstu misserum þurfum við að taka stefnumarkandi ákvarðanir varðandi dreifikerfið þannig að ég þori ekki að segja nákvæmlega hvenær það verður komið í notkun."
Páll segist vel geta skilið að fólk verði óánægt þegar beinar íþróttaútsendingar taki heilu kvöldin en segir það skyldu RÚV að sýna efni þótt það hafi ekki stóra skírskotun. "Við sýnum t.d. á kjörtíma á kvöldin heimildarmyndir sem við vitum að hafa ekki gríðarlega mikla skírskotun, kannski með 15% áhorf og það gildir um margt efni sem við erum með." Spurður hvort hann gæti hugsað sér að klippa á efni á kjörtíma fyrir annað en boltaíþróttir segir Páll það hæpið.
 

BLAÐAMANNAFUNDUR– PLAY THE GAME

(Ágúst '07) Forsvarsmenn ráðstefnunnar PLAY THE GAME efna til blaðamannafundar í Hvammi á Grand Hótel þriðjudaginn 4.september kl. 14.00 þar sem ráðstefnan verður kynnt í stórum dráttum.

Ráðstefnan PLAY THE GAME verður haldin á Íslandi dagana 28. október til 1. nóvember nk. Þetta er í fimmta sinn sem hún er haldin en sú fyrsta fór fram 1997. Þetta er hins vegar í fyrsta skipti sem hún er haldin utan Danmerkur. Búist er við um 300 íþróttafréttamönnum og háskólafólki sem sérhæfir sig í íþróttarannsóknum, til Íslands, alls staðar úr heiminum.
 
Fyrsta PLAY THE GAME ráðstefnan var haldin að tilstuðlan dönsku ungmennafélagssamtakanna, DBI, en er nú sjálfstæð eining undir forsvari Danans Jens Sejer Andersen og er eina óháða ráðstefnan um íþróttir í heiminum.  Á ráðstefnunni verða hvorki fleiri né færri en 40 fyrirlesarar um ýmislegt sem snýr að íþróttum en rauði þráðurinn í ráðstefnununum fram að þessu hefur verið að taka fyrir og kryfja ýmis áhugaverð mál í heimi íþróttanna vegar um heiminn, varpa ljósi á pólitísku hliðina á íþróttum sem er oft á tíðum með ólíkindum, skoða lyfjamál, spillingamál auk þess sem ýmsir þekktir einstaklingar úr heimi íþróttanna halda fyrirlestra.
 
Í tilefni 100 ára afmælis UMFÍ var ákveðið að ráðstefnan færi fram á Íslandi en UMFÍ leggur mikla vinnu og fjármagn í að gera hana sem glæsilegasta. 

Þar sem uppistaða gestanna á ráðstefnunni eru íþróttafréttamenn ákvað UMFÍ að bjóða Samtökum íþróttafréttamanna að gerast aðili að ráðstefnunni að þessi sinni. Stjórn SÍ þáði boðið enda sérlega áhugavert verkefni. Formaður SÍ, Þorsteinn Gunnarsson, fékk það verkefni að taka sæti í dagskrárnefnd ráðstefnunnar þar sem ákveðið verður hvaða málefni verða til umfjöllunar. PLAY THE GAME, hefur hann fengið gríðarlega jákvæð viðbrögð við því að ráðstefnan fari fram á Íslandi. Vettvangur hennar verður Grandhótel og að sjálfsögðu eru félagar í Samtökum íþróttafréttamanna hvattir til þess að mæta. Þarna verða eflaust nóg af fréttapunktum.
 
Nánari upplýsingar eru á www.playthegame.org – en þar er einnig að finna margar mjög áhugaverðar fréttir úr heimi íþróttanna um t.d. spillingamál, lyfjahneyksli og íþróttapólitík.
 

Hjörtur nýr liðsmaður RÚV

(Ágúst '07) Íþróttadeild RÚV hefur fengið góðan liðsauka en Hjörtur Hjartarson hefur þar störf innan skamms sem íþróttafréttamaður. Hjörtur lauk fjölmiðlanámi frá bandarískum háskóla í vor en hann starfaði m.a. með blaðamaður á Skessuhorni. Hjörtur er kunnur markahrókur með ÍA og nú síðast Þrótti en hann er langmarkahæstur í 1. deildinni í sumar.

KSÍ þakkar góða umfjöllun

(Ágúst ´07) KSÍ vill koma á framfæri kærum þökkum til fjölmiðla fyrir gott samstarf og frábæra umfjöllun um úrslitakeppni EM U19 landsliða kvenna, sem fram fór hér á landi í júlí. Umfjöllun ykkar átti stóran þátt í vel heppnuðu og skemmtilegu móti.
Með kærri kveðju og þökk fyrir gott samstarf.
Kveðja,
Ómar Smárason, KSÍ
 

Handritið að bókinni um Íþróttamenn ársins tilbúið

(Ágúst ´07) Hallgrímur Indriðason hefur lokið við að skrifa handrit að bók um 50 ára sögu kjörs íþróttamanns ársins sem Samtök íþróttafréttamanna gefa út í samvinnu við Eddu-útgáfu. Sögu Samtaka íþróttafréttamanna eru einnig gerð góð skil í bókinni.

Íþróttamenn ársins og/eða sérfræðingar hafa fengið sína kafla til yfirlestrar og verið er að safna myndum í bókina. Þá hefur herra Ólafur Ragnar Grímsson, forseti Íslands, ritað ávarpsorð. Vantað er til útgáfunnar og hefur Alþjóða Ólympíuhreyfingin veitt vegleganstyrk til hennar ásamt íslenskum fyrirtækjum og sérsamböndum. Reiknað er með að bókin verði tilbúin til prentunar í september.

Ný íþróttastöð í loftið

(Ágúst '07) Ný íþróttastöð, Sýn2, fór á í loftið laugardaginn 4. september sem eingöngu er helguð enska boltanum og allt sem snýr að honum. Alls verða 380 leikir í ensku úrvalsdeildinni í beinni útsendingu í vetur en einnig verður sýnt beint frá leikjum í ensku B-deildinni. Sýn2 nær til yfir 98% heimila í landinu. Íþróttafréttamenn Sýnar og Stöðvar 2 hafa í nógu að snúast en leikjunum á Sýn2 verður lýst á íslensku. Á hliðarrásunum verða íslenskir og enskir þulir. Sýn2 verður með ýmsa dagskrárgerð í kringum enska boltann í vetur en sem dæmi verða öll tilþrif dagsins sýnd á Sýn2 um leið og síðasti laugardagsleikurinn er flautaður af.

Þar með reka 365 ljósvakamiðlar tvær sjónvarpsstöðvar þar sem eingöngu er að finna íþróttaefni.

Nýr framkvæmdastjóri ÍSÍ

(Júlí '07) Framkvæmdastjórn ÍSÍ samþykkti einróma á fundi sínum 26. júlí að ráða Líneyju Rut Halldórsdóttur sem framkvæmdastjóra ÍSÍ. Líney tekur við starfinu af Stefáni Konráðssyni sem ráðið hefur sig sem framkvæmdastjóra Íslenskrar Getspár.
Líney er fyrsta konan sem gegnir starfi framkvæmdastjóra ÍSÍ, stærstu fjöldahreyfingar á Íslandi.
Líney er valin úr fjölbreyttum hópi mjög frambærilegra umsækjenda en umsækjendur um stöðuna voru rúmlega fimmtíu talsins.
Líney Rut Halldórsdóttir er 46 ára íþróttafræðingur og starfar sem deildarstjóri íþrótta- og æskulýðsdeildar Menntamálaráðuneytisins. Líney hefur starfað sem sviðsstjóri Afrekssviðs ÍSÍ og hefur víðtæka reynslu og þekkingu á starfi íþróttahreyfingarinnar.

Námskeið fyrir félaga í Samtökum íþróttafréttamanna

(Júlí '07) Heilsuakademían og Smári Jósafatsson bjóða félögum í  Samtökum Íþróttafréttamanna á sérstakt námskeið út í Viðey: Smart hlaupastíll sem byggir á aldagömlum Tai Ch'i aðferðum og hlaupastíl Afríkumanna.
Margt áþekkt Pilates líkamsbeytingu og einföldun sem auðvelt er að tileinka sér.

SJÁ NÁNAR HÉR:

Alþjóðlegur dagur íþróttafréttamanna

(Júlí '07) Í dag, 2. júlí, er Alþjóðlegur dagur íþróttafréttamanna en þetta er þrettánda árið í röð sem er haldinn að frumkvæði Alþjóðasamtaka íþróttafréttamanna, AIPS. Stjórn SÍ sendir félagsmönnum sínum baráttukveðjur í tilefni dagsins. Forseti AIPS, Gianno Merlo, skrifar pistil á heimasíðu samtakanna (aipsmedia.com) þar sem hann hvetur íþróttafréttamenn um allan heim til dáða og að standa vörð um sjálfstæði sitt.

Hrafnkell nýr íþróttastjóri RÚV

(Júní '07) Í kjölfar þess að Samúel Örn Erlingsson hættir sem yfirmaður íþróttadeildar RÚV, hafa fylgt ýmsar skipulagsbreytingar í kjölfarið. Hrafnkell Kristjánsson hefur verið ráðinn nýr yfirmaður íþróttadeildarinnar en hann hefur starfað þar sem íþróttafréttamaður undanfarin ár. Hann mun verkstýra íþróttadeildinni sem heyrir nú undir dagskrársvið þar sem Þórhallur Gunnarsson ræður ríkjum.

Hjalti og Dagur unnu fyrsta golfmót SÍ í 20 ár

(Júní '07) Fyrsta golfmótið sem Samtök íþróttafréttamanna hafa staðið fyrir á annan áratug fór fram hjá Golfklúbbi Vatnsleysustrandar.

Rétt um þriðjungur félagsmanna mætti til leiks. Leikið var með Texas scramble fyrirkomulagi og var keppni jöfn og spennandi. Eftir flókna forgjafaútreikninga stóðu Dagur á DV og Hjalti á Fréttablaðinu uppi sem sigurvegarar. Eftir mótið var boðið upp á mat og veitingar í golfskálanum.
Bláa lónið gaf glæsilega vinninga á matsölustað sínum sem er sannarlega fimm stjörnu. Mótið tókst í alla staði mjög vel og verður vonandi árlegur viðburður í framtíðinni. Rétt er að geta hversu vel var mætt frá Fréttablaðinu að þessi sinni en eini fjölmiðillinn sem ekki átti fulltrúa var RÚV! 

Þess má geta að Henry Birgir bloggar um þetta mót á http://blogg.visir.is/henry/2007/06/16/mistok-i-talningu/

Þá bloggar Sigurður Elvar um mótið á http://seth.blog.is/blog/seth/

Golfmót SÍ föstudaginn 15. júní á Vatnsleysuströnd

(Júní '07) Stjórn SÍ hefur ákveðið að halda golfmót fyrir félagsmenn og jafnframt íþróttafréttamenn sem starfa í sumarafleysingum, föstudaginn 15. júní kl. 14.00. Mótið átti að halda 1. júní sl. en var frestað vegna veðurs.

Mótið fer fram hjá Golfklúbbi Vatnleysustrandar, völlurinn er 9 holur en gríðarlega skemmtilegur og er aðeins í 10 mínútna akstursfjarlægð frá Hafnarfirði. Glæsileg verðlaun og svo borðum við saman á eftir.

Allir félagsmenn eru hvattir til að mæta, þeir sem eru lítt vanir að höndla golfkylfur mæti endilega líka. Tveir og tveir spila saman og er betri boltinn leikinn.

ATHUGIÐ! Þeir sem ætla að vera með verða að skrá sig með því að senda staðfestingu í tölvupósti á formann.... thorsteinn.gunnarsson@365.is

Ævintýraferð Valtýs Björns til Olympíu

(Júní '07) Valtýr Björn Valtýsson íþróttafréttmaður fór á ráðstefnu í Olympiu í Grikklandi7. til 12. maí sl. í boði Alþjóða Ólympíuhreyfingarinnar. Ólympíuhreyfingin bauð alls 40 íþróttafréttamönnum (frá 40 löndum) og stóð Íslandi til boða að senda einn fulltrúa eins og greint var frá á heimasíðunni á sínum tíma. Aðal umfjöllunarefni ráðstefnunnar var Ólympíuandinn og siðferðisrammi íþróttafréttamanna og var Valtýr Björn sá eini sem sótti um að fara. ÍSÍ styrkti hann til fararinnar.

Að beiðni heimasíðunnar skrifaði Valtýr Björn smá pistil um ævintýraferð sína til Olympiu og má lesa hann hér.

Liðsauki á Sýn

(Júní '07) Íþróttafréttamönnum á Sýn hefur fjölgað um tvo enda fjölgar þar verkefnum með tilkomu enska boltans í ágúst. Nýjasti liðsmaður  íþróttadeildar Sýnar er Guðmundur Benediktsson sem áður var lýsandi og pródúsent á Skjásporti en hann er enn sjálfur á fullu í boltanum með Val. Hann hefur verið ráðinn í fullt starf á Sýn. Þá hefur Hans Steinar Bjarnason verið í afleysingum frá síðustu áramótum en verður áfram í fullu starfi. Þar með eru sex íþróttafréttamenn á Sýn (og Stöð 2) í fullu starfi.

Samúel Örn hættir hjá RÚV 1. júlí

(Júní '07) Samúel Örn Erlingsson, yfirmaður íþróttadeildar RÚV, hefur ákveðið að láta af störfum frá og með 1. júlí nk. eftir 25 ára starf hjá stofnuninni. Hann segir í viðtali við Blaðið að RÚV standi á tímamótum og hann einnig og því tilvalinn tími til að staldra við og velta fyrir sér hlutunum. Ekki er ljóst hvað Samúel Örn tekur sér fyrir hendur en hann reiknar jafnvel með því að setjast á skólabekk. Hann fer yfir víðan völl í viðtalinu og rifjar upp eftirminnileg atvik úr starfi sínu sem íþróttafréttamaður. Samtök íþróttafréttamanna senda Samúel Erni baráttu- og saknarkveðjur á þessum tímamótum. Samúel Örn var í tvígang formaður SÍ, fyrst 1984-1987 og aftur 1988-1992. Hann bar ávallt hag samtakanna fyrir brjósti og á t.d. stóran þátt í því hversu kjör íþróttamanns ársins tók miklum stakkaskiptum þegar það var fært inn í sjónvarpssal. Þá var hann áberandi forystumaður samtakanna bæði á Norðurlandaþingum og AIPS-þingum.

Myndin er fengin af heimasíðu kappans: www.samuelorn.is

Viðburðarríkt þing hjá AIPS í Bregenz í Austurríki

(Maí '07) AIPS, Alþjóðasamtök íþróttafréttamanna, héltu sitt árlega þing að þessu sinni í Bregenz í Austurríki en á næsta ári fer fram EM í knattspyrnu í Austurríki og Sviss. Formaður, SÍ, Þorsteinn Gunnarsson, sótti þingið. Til Bregenz komu fulltrúar frá 107 löndum en þetta var afmælisþing, það sjötugasta í röðinni og því var það veglegra en oft áður og aðsóknin aldrei verið betri.

Ýmis hagsmunamál íþróttafréttamanna um allan heim báru á góma að vanda en segja má að þingið hafi verið nokkuð sögulegt að þessu sinni. Framkvæmdastjóri AIPS, ákvað að segja af sér fyrir þingið til þess að axla ábyrgð á fjármálaóreiðu innan AIPS á valdatíð fyrrverandi forseta. Á þinginu sjálfu dró hann uppsögnina til baka og þá varð uppi fótur og fit og framkvæmdastjórnin hótað að segja af sér í heilu lagi. Það fór svo að framkvæmdastjórinn sagði upp störfum öðru sinni.
Álfurnar funda einnig á þinginu. UEPS (Evrópusamtök íþróttafréttamanna) héldu einnig sinn aðalfund  meira

Misbrestur í aðstöðu fjölmiðlamanna

(Maí '07) Samtök íþróttafréttamanna sendu út GÁTLISTA til félaganna í Landsbankadeild karla áður en Íslandsmótið hófst til þess að auðvelda þeim að skapa íþróttafréttamönnum viðunandi vinnuaðstöðu.

Eftir fyrstu umferðina verður að segjast eins og er að því miður féllu of mörg félög á prófinu á sama tíma og önnur félög voru til mikillar fyrirmyndar og eru strax komin á blað þegar við munum verðlauna fyrir bestu aðstöðuna. Helst vantaði að blaðafulltrúar gæfu sig fram, misbrestur var á leikskýrslum, kaffi og meðlæti var á sumum völlum ekki sjáanlegt osfrv. osfrv.

Versta aðstaðan var á sjálfum Laugardalsvellinum á viðureign Vals og Fram. Þar voru íþróttafréttamenn látnir sitja úti í kuldanum, þeir fengu hvorki vott né þurrt og leikskýrslur fuku út um allt. Sem betur fer rigndi ekki. Eftir kvartanir var íþróttafréttamönnum hleypt inn í samkomusal eftir u.þ.b. 20 mín. með glæsilegt útsýni yfir völlinn. Það eru tilmæli til KSÍ, Vals og Fram að þar verði okkur boðin aðstaða í framtíðinni á leikjum í Landsbankadeild, það er vanvirðing við okkur að bjóða okkur upp á að sitja úti þegar allra veðra er von.

Meðfylgjandi er GÁTLISTINN sem við sendum út á dögunum, hann á að auðvelda félögunum að standa sig í stykkinu. Góð ábending barst með leikskýrslu, að hafa hana Á EINU BLAÐI en ekki tveimur, eins og KR-ingar o.fl. hafa löngum gert.

Bréf þetta var sent til forráðamanna félaganna í Landsbankadeildinni og KSÍ.

Vel heppnað Norðurlandaþing í Svíþjóð - Næsta þing í Eistlandi
 

(Maí '07) Norðurlandaþing íþróttafréttamanna fór fram í Ronneby í Svíþjóð 3. til 6. maí síðastliðinn.Þingið tókst í alla staði mjög vel og var Svíum til sóma. Ýmisleg fróðleg erindi voru haldin og svo farið á veðreiðar og ýmislegt fleira. Stjórn samtaka SÍ fór á þingið, þ.e. Þorsteinn, Guðmundur og Jón Kristján en Hrafnkell forfallaðist á síðustu stundu af óviðráðanlegum orsökum. Ákveðið var að næsta þing fari fram í Eistlandi eftir tvö ár en Eistar hafa verið þátttakendur á Norðurlandaþinginu síðan 1997.
Ítarlega frásögn um Norðurlandaþingið í Svíþjóð má finna hér.

Danska sjónvarpið hættir með íþróttadeild
 

(Maí '07) Forráðamenn danska ríkisútvarpsins hyggjast leggja niður íþróttadeild sjónvarpsins í sparnaðarskyni, alla vega í þeirri mynd sem hún er nú segir fréttavefur Berlingske Tidende. Þremur yfirmönnum íþróttadeildarinnar hafa verið boðin störf annarsstaðar hjá útvarpinu.
Sýningarréttur sem ríkisútvarpið á vegna heimsmeistaramótsins í knattspyrnu og Ólympíuleikanna verður seldur og þáttagerð lögð af, en íþróttafréttir verða áfram sagðar í almennum fréttatímum.
BT segir tillögurnar verða teknar fyrir á stjórnarfundi Danmarks Radio á morgun. Ástæðan fyrir þessari ákvörðun er sögð sú að DR verði að skera rekstrarkostnað verulega niður vegna gríðarlegs kostnaðar við byggingu nýrra höfuðstöðva fyrirtækisins.
Danska íþróttasambandið harmaði í dag fyrirhugaðar aðgerðir og segir að þær muni bitna mjög á minni íþróttagreinum.

Af ruv.is
 

Gátlisti til liðanna í Landsbankadeildunum

(Maí '07) Samtök íþróttafréttamanna hafa sent liðunum í Landsbankadeildum karla og kvenna GÁTLISTA sem þau geta stuðst við til þess að bæta aðstöðu fjölmiðlafólks á leikjum í sumar. Gátlistinn hefur fengið góðar móttökur hjá félögunum. Samtök íþróttafréttamanna ætla svo að verðlauna þau félög sem standa sig best í að bæta aðstöðu íþróttafréttamanna í sumar.
Gátlistann má sjá hér.

Undirbúningur bókarinnar gengur samkvæmt áætlun

(Apríl '07) Eins og greint var frá í 50 ára afmælisfagnaði SÍ í haust stendur til að gefa út bók næsta haust um 50 ára sögu kjörsins á íþróttamanni ársins. Hallgrímur Indriðason, fréttamaður á RÚV og fyrrverandi íþróttafréttamaður og félagsmaður SÍ, er langt kominn með að skrifa bókina, sem gefin verður út í samvinnu við Eddu-útgáfu. Sigurður Svavarsson kemur að útgáfunni fyrir hönd Eddu-útgáfu en Þorsteinn Gunnarsson fyrir hönd SÍ. Hallgrímur er langt kominn með að skrifa handrit að útgáfunni. Óskar Ófeigur, íþróttafréttamaður á Fréttablaðinu, mun sjá um umbrot. Ágætlega gengur að fjármagna útgáfuna og er sú vinna á lokasprettinum.

Adolf Ingi gestur í sumarskóla UEPS

(Apríl '07) Adolf Ingi Erlingsson, fyrrverandi formaður SÍ, verður gestur í Sumarskóla Evrópusamtaka íþróttafréttamanna (UEPS). Sumarskólinn verður í Olympíu í Grikklandi síðustu vikuna í maí. Þar sem formaður SÍ, Þorsteinn Gunnarsson, átti ekki heimangengt, buðu Evrópusamtökum Adolfi Inga að koma. Hann mun halda fyrirlestur í Sumarskólanum og verður væntanlega ekki í nokkrum vandræðum með að koma fyrir sig orði!

Samúel Örn áfram hjá RÚV

(Apríl '07) Breytingarnar á íþróttadeild RÚV sem urðu í kjölfar þess að stofnunni var breytt í opinbert hlutafélag (sjá neðan) urðu ekki eins miklar og haldið var í fyrstu. Samúel Örn Erlingsson verður áfram yfirmaður íþróttadeildarinnar en hún mun engu að síður færast undir dagskrárdeild. Landsmenn munu því njóta góðs af því að reynsluboltinn og fagmaðurinn Samúel Örn muni áfram stýra íþróttadeildinni af sama myndarskap og hann hefur gert.
 

Norðurlandaþing í maí

(Apríl '07) Norðurlandaþing íþróttafréttamanna verður haldið í fyrstu helgina í maí en það fer fram í Ronneby í Svíþjóð. Að vanda verður fundað um málefni samtakanna en meðal gesta á þinginu verða formaður og framkvæmdastjóri sænska knattspyrnusambandsins, formaður sænska íþróttasambandsins, formaður sænsku Ólympíunefndarinnar og fleiri. Einnig verður farið á sænskar hestaveðreiðar, svo eitthvað sé nefnt. Alls fara 4-5 félagsmenn á þingið og áhugasamir geta haft samband við formann.

Aðgangur að HM í frjálsum íþróttum

(Mars '07) Heimsmeistaramótið í frjálsum íþróttum fer fram í Osaka í Japan 25. ágúst til 2. september nk. Samkvæmt upplýsingum frá mótshöldurum fá íslenskir fjölmiðlar pláss fyrir einn skrifandi íþróttafréttamann en engan ljósmyndara. Umsóknarfrestur rennur út 20. apríl nk. og sendist á wpph@osaka2007.or.jp. Ef fleiri en einn fjölmiðill hefur áhuga að fara verður reynt að bregðast við því. Bréfið frá mótshöldurum má sjá hér.

Íþróttafréttir og pólitík

(Mars ´07) Pétur Gunnarsson er einn af mörgum bloggurum. Hann veltir þeirri spurningu upp í bloggi sínu hvernig það sé eiginlega með íþróttafréttamenn og pólitík. "Ég er nokkuð viss um að aldrei hafa jafnmargir núverandi og fyrrverandi íþróttafréttamenn verið í framboði til Alþingis og nú. Tveir þeirra eru leiðtogar sinna flokka," segir Pétur m.a. Slóðin á bloggið hans er: http://hux.blog.is/blog/hux/#entry-154800.

Fréttamannastyrkir Norðurlandaráðs 2007
 

(Mars '07) Norðurlandaráð veitir fréttamönnum á Norðurlöndum árlega styrki til að fjalla um norræn málefni og árið 2007 kemur í Íslands hlut fjárhæð að upphæð 90.000 danskar krónur. Rétt er að vekja athygli á því að þessir styrkir eru einnig fyrir íþróttafréttamann. Styrkjunum er ætlað að auka áhuga fréttamanna á norrænum málefnum og norrænu samstarfi og gera þeim m.a. kleift að fjármagna ferðalög tengd greinaskrifum eða umfjöllun.
Styrkir eru veittir einum eða fleiri (íþrótta)fréttamönnum dagblaðs, tímarits, útvarps eða sjónvarps. Sjálfstætt starfandi fréttamönnum er einnig heimilt að sækja um styrk.
Styrkjum er úthlutað á grundvelli greinargerða í umsókn. Við styrkveitinguna er m.a. (meira)

Breytingar hjá RÚV

(Mars '07) Í kjölfar þess að Ríkisútvarpinu var breytt í opinbert hlutafélag á dögunum var staða yfirmanns íþróttadeildar, sem Samúel Örn Erlingsson hefur gegnt undanfarin ár, lögð niður. Jafnframt var íþróttadeildin færð undir dagskrárdeild RÚV ohf. en nýr yfirmaður hennar er Þórhallur Gunnarssson sem hefur verið ritstjóri Kastljóssins. Þórhallur er því í raun nýr yfirmaður íþróttadeildar RÚV ohf. Óvíst er hvað tekur við hjá Samúel Erni en sem kunnugt er hreppti hann annað sætið á lista Framsóknarflokksins í Suðvesturkjördæmi fyrir komandi Alþingiskosningar og það er aldrei að vita nema að hann komist á þing!

Valtýr Björn til Grikklands

(Mars '07) Valtýr Björn Valtýsson íþróttafréttmaður fer á ráðstefnu í Olympiu í Grikklandi 7. til 12. maí nk. í boði Alþjóða Ólympíuhreyfingarinnar. Ólympíuhreyfingin býður alls 40 íþróttafréttamönnum (frá 40 löndum) og stendur Íslandi til boða að senda einn fulltrúa eins og greint var frá á heimasíðunni á sínum tíma. Aðal umfjöllunarefni ráðstefnunnar eru Ólympíuandinn og siðferðisrammi íþróttafréttamanna og var Valtýr Björn sá eini sem sótti um að fara. ÍSÍ styrkir hann til fararinnar sem eflaust verður mikið ævintýri fyrir kappann.

Gamli verðlaunagripurinn til sýnis á Þjóðminjasafninu

(Mars '07) Gamli verðlaunagripurinn sem fylgdi kjöri íþróttamanns ársins fyrstu 50 árin er nú til sýnis í anddyri Þjóðminjasafnsins en safnið fékk hann að gjöf frá Samtökum íþróttafréttamanna þann 1. desember sl.

Verðlaunagripurinn vekur mikla athygli enda geymir hann einstaka sögu íþróttaafreka í hálfa öld og að sögn starfsfólks safnsins byrja allir safngestir á því að gefa sér góðan tíma í að skoða gripinn áður en farið er inn á safnið. Á myndinni má sjá tvær ungar stúlkur, Valgerði Maríu og Guðnýju Evu, skoða verðlaunagripinn á dögunum. Eins og sjá má er búið að smíða sérstakan skáp utan um verðlaunagripinn sem er alltaf jafn glæsilegur á að horfa.

Elvar Geir á DV

(Mars '07) DV hefur fengið liðsauka því Elvar Geir Magnússon hefur tekið til starfa sem íþróttafréttamaður. Elvar Geir hefur starfað á Fréttablaðinu undanfarin misseri samhliða námi. Þar með eru þrír starfandi íþróttafréttamenn hjá DV en sem kunnugt er var það gert að dagblaði á ný í lok febrúar. Þess má geta að Elvar Geir bloggar á http://elvargeir.blog.is/blog/elvargeir

Klúður mótshaldara á HM í sundi

(Mars '07) AIPS, Alþjóðasamtök íþróttafréttamanna, hafa mótmælt vinnubrögðum mótshaldara í Ástralíu en HM í sundi fer fram í Melbourne í þessum mánuði. Mótshaldarar ætla sér að græða á íþróttafréttamönnum  með því að rukka þá um 770 dollara fyrir fulla þjónustu í fréttamannamiðstöð mótsins, þ.e. sæti, borð og aðgang að interneti. Þess má geta að stærsta farsímafyrirtæki Ástralíu, Telstra, er einn helsti styrktaraðili mótsins en engu að síður ætla mótshaldarar að fara  þessa nýju leið sem hefur farið mjög fyrir brjóstið á  íþróttafréttamönnum um allan heim.

Mótshaldarar segja að takmarkað pláss fyrir íþróttafréttamenn knýji  þá í þessar aðgerðir til þess að hugsanlega fækka þeim  íþróttafréttamönnum sem koma til Ástralíu á mótið. Óvíst er hvaða  afleiðingar þetta hefur í för með sér.

Mótmælabréf AIPS má sjá hér: http://www.aipsmedia.com/index.php?page=news&cod=880&tp=n

Nýtt íþróttablað

(Febr. '07) Þriðjudaginn 26. febrúar sl. fylgdi 20 síðna íþróttablað með Fréttablaðinu. Þar er augljóslega ætlunin að fjalla um íþróttir og íþróttafólk á annan hátt en á hefðbundnum íþróttasíðum dagblaðanna en forsíðuna prýðir sunddrottningin Ragnheiður Ragnarsdóttir. Íþróttablaðið kemur út einu sinni í mánuði en ritstjóri en Óskar Hrafn Þorvaldsson, fyrrverandi íþróttafréttamaður á DV, Fréttablaðinu og síðar ristjóri DV.

Aðalfundur SÍ fyrir árið 2006

(Febr. '07) Aðalfundur SÍ fyrir árið 2006 var haldinn 21. febrúar. Góð mæting var á fundinn en alls mættu 16 af 24 skráðum félögum. Nýjasti meðlimurinn er Benedikt Bóas Hinriksson á DV en félagar í SÍ hafa aldrei verið fleiri.

Þorsteinn Gunnarsson, formaður SÍ, flutti skýrslu stjórnar og fór yfir síðasta ár sem var ansi viðburðarríkt. 50 ára afmæli SÍ var haldið með pompi og pragt, ný heimasíða samtakanna var opnuð, kjör á íþróttamanni ársins fór fram með glæsibrag, undirbúningur er hafinn að útgáfu bókar um sögu kjörs íþróttamanns ársins, verðlaunagripurinn sem fylgt hefur kjöri íþróttamanns ársins frá upphafi var afhentur Þjóðminjasafninu, svo eitthvað sé nefnt.

Jón Kristján Sigurðsson gjaldkeri lagði fram ársreikninga. Hagnaður síðasta árs var um 330 þúsund krónur en rekstrartekjur voru um 920 þúsund.

Þrjár breytingartillögur um reglugerð á íþróttamanni ársins lágu fyrir fundinum og varð töluverð umræða um þær allar. Felld var tillaga um að afnema leynilegt kjör á íþróttamanni ársins. Tillaga um að aðeins íþróttamenn sem iðka íþróttagreinar innan ÍSÍ komi til greina í kjöri íþróttamanns ársins var samþykkt og einnig var samþykkt tillaga um hvernig skuli staðið að kjörinu verði tveir eða fleiri íþróttamenn (meira)

Annað spennandi námskeið í Grikklandi

(Febr. '07) Alþjóða Ólympíuhreyfingin (IOA) hefur sent ÍSÍ boð um að bjóða einum íslenskum íþróttafréttamanni á ráðstefnu í Olympiu í Grikklandi 7. til 12. maí nk. Ólympíuhreyfingin býður alls 40 íþróttafréttamönnum (frá 40 löndum) og stendur Íslandi til boða að senda einn fulltrúa. Aðal umfjöllunarefni ráðstefnunnar eru Ólympíuandinn og siðferðisrammi íþróttafréttamanna. Þátttakendur mega ekki vera eldri en 45 ára og rennur umsóknarfrestur út 15. mars nk. og þarf að senda með bréf um vangaveltur viðkomandi um viðfangsefni ráðstefnunnar. Uppihald er allt í boði Alþjóða Ólympíuhreyfingarinnar sem og flutningar frá Aþenu til Olympia. SÍ munu reyna að koma eitthvað til móts við þátttakendur, í samvinnu við ÍSÍ, um að greiða flugið. Áhugasamir hafi samband við formann SÍ sem fyrst. Hér má sjá bréfið frá IOA.

Henry Birgir tilnefndur til Blaðamannaverðlauna

(Febr. ´07) Dómnefnd Blaðamannaverðlauna Íslands fyrir árið 2006, hefur tilnefnt Henry Birgi Gunnarsson, íþróttafréttamann á Fréttablaðinu, til Blaðamannaverðlauna í flokknum Rannsóknarblaðamennska. Henry Birgir er tilefndur fyrir fréttaskrif og eftirfylgd þar sem upplýst er um mikinn mun á launum og kjörum karla og kvenna í A-landsliðum Íslands í knattspyrnu.
Þetta er í fyrsta skipti sem íþróttafréttamaður er tilnefndur til Blaðamannaverðlauna. Við óskum Henry Birgi innilega til hamingju tilnefninguna.
 

Aðalfundur SÍ miðvikudaginn 21. febrúar

(Febr. ´07) Aðalfundur Samtaka íþróttafréttamanna fyrir árið 2006 verður haldinn miðvikudaginn 21. febrúar nk. kl. 15 (klukkan þrjú), í fundarsal UMFÍ í Hekluhúsinu við Laugarveg (UMFÍ flutti um set á dögunum). 
Dagskrá: Venjuleg aðalfundarstörf, samkvæmt lögum félagsins:
I. Inntaka nýrra félaga
II. Kosning fundarstjóra og fundarritara.
III. Skýrsla stjórnar og reikningar lagðir fram.
IV. Lagabreytingar.
V. Stjórnarkosning.
VI. Árgjald félagsmanna.
VII. Önnur mál.
VIII. Fundargerð lesin upp, fundarslit.

Athygli er vakin á því að tillögur um lagabreytingar skulu hafa borist félögum SÍ tveimur dögum fyrir aðalfund, samkvæmt lögum félagsins.
 

Spennandi námskeið í Grikklandi í lok maí

(Febr. ´07) Evrópusamtök íþróttafréttamanna, UEPS, auglýsa fyrsta sumarskólann sem haldinn er á vegum samtakanna. Um er að ræða viku námskeið, frá 24. til 31. maí í Olympíu í Grikklandi, í beinu framhaldi af úrslitaleik Meistaradeildar Evróu sem fram fer í Aþenu 23. maí. Námskeiðið er fyrir íþróttafréttamenn 45 ára og yngri en eldri eru einnig velkomnir.
Kostnaðurinn, fyrir utan flug, er aðeins 300 Evrur. Innifalið er námskeið í ensku, fyrirlestrar, skoðunarferðir og ýmislegt fleira.
Hvert aðildarland UEPS hefur rétt að lágmarki tveimur sætum á þessu námskeiði.
Áhugasamir sæki sjálfir um hjá UEPS en allar nánari upplýsingar og skráning er að finna á heimasíðu samtakanna: www.ueps-media.com

Óásættanleg vinnubrögð

(Feb. 07) Nýlokið er glæsilegu heimsmeistaramóti í handbolta í Þýskalandi. Íslenskir fjölmiðlar hafa líklega aldrei fjallað með eins miklum glæsibrag um mótið en allir stærstu fjölmiðlar landsins sendu íþróttafréttamenn á mótið. Hins vegar reyndist þrautin þyngri fyrir íþróttafréttamenn af dagblöðunum að komast á sjálfan úrslitaleikinn í Köln því þrátt fyrir að hafa passa á alla leiki var t.d. íþróttafréttamönnum Morgunblaðsins meinaður aðgangur að leiknum. Þeir fengu að fara í miðstöð fréttamanna en fengu ekki að sjá leikinn sjálfan. Þetta eru auðvitað algörlega óásættanleg vinnubrögð og hefur formaður SÍ, sent bréf til AIPS þar sem þess er óskað að samtökin mótmæli þessum gjörningi þýskra. Bréfið má sjá hér.

Æsispennandi keilukeppni

(Febr. '07) Föstudagskvöldið 26. janúar, strax að leik Dortmund og Bayern München loknum, fór fram fjölmiðalmót í keilu á nýrri og fullkominni keilubraut í kjallara Ringhotel Drees í Dortmund. Þrjár sveitir mættu til leiks en þær voru frá Fréttablaðinu, Stöð 2 og Morgunblaðinu. Var hver sveit skipuð tveimur mönnum og var keppnisfyrirkomulag einfalt og vann sú sveit umferðina sem felldi flestar keilur í hverri umferð. Skemmst er frá því að segja að sveit Morgunblaðsins vann, hafði betur í 11 umferðum. Stöð 2 varð í öðru sæti með 9 vinninga en sveit Fréttablaðsins rak lestina með  6 vinninga. Sveit Morgunblaðsins sem skipuð var þeim Ívari Benediktssyni og Víði Sigurðssyni gerði svo gott sem út um leikinn í fyrri umferð með því að krækja þá í níu vinninga þegar þeir fóru hamförum og náðu hverri fellunni á fætur annarri eftir að hafa farið rólega af stað. Sveit Stöðvar 2 sem skipuð var keilulandsliðsmanninum Birni Sigurðssyni og Arnari Björnssyni sótt mjög í sig verðið í seinni hlutanum en tókst ekki vinna upp í síðari hlutanum þann mikla mun sem Morgunblaðið hafði náð í fyrri hlutanum. Þrátt fyrir stífar æfingar daga á undan þá tókst Pjetri Sigurðssyni og Henry Birgi Gunnarssyni frá Fréttablaðinu ekki að sýna sínar bestu hliðar í keppninni sem olli a.m.k. öðru keppandandum miklu hugarangri um stund.
Allt var þetta til gamans gert og tókst keppnin með mikum ágætum auk þess sem hún var kærkomin til þess að brjóta upp langa vinnudaga manna á meðan á heimsmeistaramótinu í handknattleik stóð.

AIPS auglýsir styrki

(Febr. '07) Alþjóðasamband íþróttafréttamanna (AIPS) auglýsir styrkveitingar fyrir íþróttafréttamenn sem hafa áhuga á því að afla sér reynslu og menntunar. Annars vegar er um að ræða styrki til að fara á heimsmeistaramótið í borðtennis í Zagreb í maí og hins vegar styrk fyrir íþróttafréttamann sem kemur ekki frá ensku mælandi landi.
Meðfylgjandi er bréfið frá formanni AIPS: meira

Samtök íþróttafréttamanna aðili að ráðstefnunni PLAY THE GAME - haldin á Íslandi í lok október nk.

(FEB. '07) Ráðstefnan PLAY THE GAME verður haldin á Íslandi dagana 28. október til 1. nóvember nk. Þetta er í fimmta sinn sem hún er haldin en sú fyrsta fór fram 1997. Þetta er hins vegar í fyrsta skipti sem hún er haldin utan Danmerkur. Búist er við um 300 íþróttafréttamönnum og háskólafólki sem sérhæfir sig í íþróttarannsóknum, til Íslands, alls staðar úr heiminum.

Fyrsta PLAY THE GAME ráðstefnan var haldin að tilstuðlan dönsku ungmennafélagssamtakanna, DBI, en er nú sjálfstæð eining undir forsvari Danans Jens Sejer Andersen og er eina óháða ráðstefnan um íþróttir í heiminum.  Á ráðstefnunni verða hvorki fleiri né færri en 40 fyrirlesarar um ýmislegt sem snýr að íþróttum en rauði þráðurinn í ráðstefnununum fram að þessu hefur verið að taka fyrir og kryfja ýmis áhugaverð mál í heimi íþróttanna vegar um heiminn, varpa ljósi á pólitísku hliðina á íþróttum sem er oft á tíðum með ólíkindum, skoða lyfjamál, spillingamál auk þess sem ýmsir þekktir einstaklingar úr heimi íþróttanna halda fyrirlestra. Þar má nefna hlaupakonuna Kelli Wihte sem féll á lyfjaprófi á sínum tíma en hún hélt afar áhugaverðan fyrirlestur á ráðstefnunni fyrir tveimur árum.

Í tilefni 100 ára afmælis UMFÍ var ákveðið að ráðstefnan færi fram á Íslandi meira

Áhugaverð umfjöllun Morgunblaðsins

(Jan. '07) Áhugaverð umfjöllun er í sunnudagsútgáfu Morgunblaðsins 28. janúar um konur og íþróttir. Þar er m.a. fjallað um kjör íþróttamanns ársins þar sem réttilega er bent á að aðeins þrjár konur hafi verið valdar Íþróttamaður ársins. Í umfjölluninni er m.a. rætt við tvær landsþekktar íþróttakonur og viðhorf þeirra til kjörsins, þær Ragnheiði Runólfsdóttur og Ásthildi Helgadóttur, en hvorug þeirra vill kynskipta kjörinu. Yfirskrift greinarinnar er "ÞRJÁR KONUR Á HÁLFRI ÖLD". Greinin kemur hér:

Hlutur kvenna í kjöri Samtaka íþróttafréttamanna á íþróttamanni ársins hefur verið rýr gegnum tíðina en í ríflega fimmtíu ára sögu kjörsins hafa aðeins þrjár konur hrósað sigri, Sigríður Sigurðardóttir handknattleikskona (1964), Ragnheiður Runólfsdóttir sundkona (1991) og Vala Flosadóttir stangarstökkvari (2000).
Ólafur Rafnsson segir þetta umhugsunarefni.  meira

Íþróttafréttamenn veðja á Platini

(Jan. '07) Samkvæmt netkönnun AIPS, Alþjóðasambandi íþróttafréttamanna, veðjar meirihluta þeirra á að Michel Platini leggi Lennart Johansson að velli í forsetakjöri UEFA. Johannsson fékk 67.82% atkvæða en Johansson 32.18%. Íþróttafréttamenn í yfir 40 löndum tóku þátt í kjörinu. Kjörið fer fram næsta föstudag.
Sænska blaðið Aftonbladet reiknar með mjög spennandi kjöri. Samkvæmt úttekt blaðsins hafa Platini og Johansson stuðning 22ja landa hvor, 8 lönd eru óákveðin. Athyglisvert er að KSÍ styður Platini í kjörinu, samkvæmt úttekt sænska blaðsins. Það gera einnig Danmörk og Færeyjar en Norðmenn styðja Johansson og að sjálfsögðu Svíar.

Sjá nánar:
http://www.aipsmedia.com/index.php?page=news&cod=731&tp=n
http://www.aftonbladet.se/vss/sport/story/0,2789,982518,00.html

Svo fór að íþróttafréttamenn reyndust sannspáir því Platini lagði Johannsson að velli í kjörinu. Platini, sem er 51 árs gamall, fékk 27 atkvæði en Johansson, sem er 77 ára, hlaut 23 atkvæði.

Styrkur frá Alþjóða Ólympíuhreyfingunni

(Jan. '07) Þær ánægjulegu fréttir bárust á dögunum að Alþjóða Ólympíuhreyfingin hefur endanlega staðfest 10 þúsund dollara styrkveitingu til Samtaka íþróttafréttamanna vegna bókar sem verið er að skrifa um sögu Íþróttamanns ársins frá upphafi. Hallgrímur Indriðason, fréttamaður á RÚV og fyrrverandi íþróttafréttamaður, situr þessa dagana við skriftir en hann byggir bókina að hluta til á mjög vönduðum útvarpsþáttum sem hann gerði um íþróttamenn ársins fyrir nokkrum árum. Samtök íþróttafréttamanna gefa út bókina í samvinnu við Eddu-útgáfu þar sem velgjörðarmaður okkar, Sigurður Svavarsson, vakir yfir útgáfunni. Stefnt er að útgáfu bókarinnar næsta haust.

Hvor verður næsti forseti UEFA?

(Jan. '07) Svíinn Lennart Johannsson, núverandi forseti Knattspyrnusambands Evrópu (UEFA), og Frakkinn Michel Platini, berjast um forsetaembætti UEFA en kosið verður á næstunni. Allt stefnir í spennandi kosningar.
Nú stendur yfir könnun á vef Alþjóðasambands íþróttafréttamanna, aipsmedia.com, þar sem félagsmönnum gefst kostur að velja á milli Johannsson og Platini. Farið endilega inn á vefinn og takið þátt en þið þurfið að skrá inn AIPS-númerið ykkar áður en þið greiðið atkvæði. Kosningu lýkur mánudaginn 22. janúar.

Breytingar hjá íþróttafréttamönnum

(Jan. '07) Nokkrar breytingar hafa orðið á högum íþróttafréttamanna að undanförnu. Eftir að útvarpsstöðin XFM var lögð niður færði Valtýr Björn Valtýsson sig yfir á á X-ið 977 sem er í eigu 365. Hann verður áfram með þáttinn sinn, Mín skoðun, á milli kl. 12-14, mánudaga til föstudaga. Þá hafa þeir Óskar Ófeigur Jónsson og Dagur Sveinn Dagbjartsson haft vistaskipti. Óskar Ófeigur fór frá DV yfir á Fréttablaðið en Dagur Sveinn í hina áttina. Þá er Benedikt Bóas Hinriksson tekinn til starfa sem íþróttafréttamaður á DV sem verður að dagblað að nýju á næstunni. Þess má einnig geta að Hans Steinar Bjarnason er í fullu starfi þessa dagana sem íþróttafréttamaður hjá Stöð 2 og Sýn.

Tveir nýir félagsmenn

(Jan. '07) Tveir nýir félagsmenn hafa bæst í Samtök íþróttafréttamanna og uppfylla þar með öll skilyrði fyrir inngöngu. Lovísa Árnadóttir og Benedikt Rafn Rafnsson gengu í félagið á síðasta fundi. Bæði starfa þau sem íþróttafréttamenn á RÚV í fullu starfi. Þar með eru félagsmenn SÍ orðnir 23 en Lovísa er eina konan í félaginu. Nánar hér

FRÉTTIR ÁRSINS 2006