Íþróttamaður ársins 2011 - Heiðar í hóp hinna útvöldu

Heiðar Helguson var í gær útnefndur íþróttamaður ársins 2011 af Samtökum íþróttafréttamanna. Heiðar hlaut 229 stig í kjörinu, 30 stigum meira en spjótkastarinn Ásdís Hjálmsdóttir sem varð í öðru sæti. Þetta var í 56. sinn sem íþróttamaður ársins er valinn en Heiðar er fyrsti knattspyrnumaðurinn sem hlýtur útnefninguna síðan Margrét Lára Viðarsdóttir var valin árið 2007. Hann er sjöundi knattspyrnumaðurinn frá upphafi sem verður fyrir valinu.

Hann var vitanlega hæstánægður með viðurkenninguna en segir að hann hafi ekkert leitt hugann að því hvort hann taldi sig eiga möguleika áður en listi yfir þá tíu sem flest atkvæði fengu í kjörinu var birtur í fjölmiðlum á aðfangadag.

„En þá vildi maður auðvitað vinna þetta," sagði hann. „En ég get ekki sagt að þetta sé eitthvað sem ég átti nokkru sinni von á að fá. Þetta var því óvænt og mikil ánægja. Ég er stoltur af þessari útnefningu og þetta fer nálægt því að vera toppurinn á mínum ferli."

Heiðar átti mjög góðu gengi að fagna á árinu 2011. Lið hans, Queens Park Rangers, bar sigur úr býtum í ensku B-deildinni í vor og vann sér um leið sæti í ensku úrvalsdeildinni. Heiðar er þar markahæsti leikmaður liðsins með sjö mörk en hann skoraði einnig mikið á síðari hluta síðasta tímabils. „Ég held að með þessari útnefningu sé árið 2011 orðið það besta hingað til á ferlinum," segir Heiðar um afrek hins nýliðna árs.

Hann segir að það standi upp úr á knattspyrnuferlinum að hafa komist upp í úrvalsdeildina með QPR eftir nokkur skrautleg ár hjá félaginu. Heiðar samdi við það sem lánsmaður frá Bolton í nóvember árið 2008, skoraði mikið og var svo keyptur í janúar 2009. Félagið gekk í gegnum miklar breytingar á næstu árum og Heiðar fékk ekki alltaf að spila eins mikið og hann vildi. Hann var til að mynda lánaður í tvígang til Watford, sem hann lék með frá 2000 til 2005.

„Það var toppurinn að komast upp. Ég hef eytt meirihlutanum af mínum ferli í þessari deild og eiginlega aldrei áður tekið í toppbaráttunni. Það hafði reynst erfitt fyrir QPR að komast upp, sérstaklega eftir ruglið sem gekk á síðustu 2-3 ár á undan. Það var í raun algjör sirkus," segir Heiðar en hann hrósar Neil Warnock, núverandi knattspyrnustjóra, mikið en hann tók við liðinu í mars árið 2010. „Hann náði að snúa gengi liðsins við á aðeins fjórtán mánuðum og kom því upp í úrvalsdeildina."

Heiðar kom fyrst til Englands í janúar árið 2000 eftir að hafa verið í tvö ár hjá Lilleström í Noregi. Þá samdi hann við Watford sem var nýliði í ensku úrvalsdeildinni. Liðið féll þó um vorið og Heiðar var í ensku B-deildinni þar til að hann var keyptur til Fulham árið 2005. Tveimur árum síðar samdi hann við Bolton en meiðsli hrjáðu hann mikið á þessum árum.

„Mér finnst að ég hefði átt að fá fleiri ár í ensku úrvalsdeildinni. Ég spilaði mismikið á þeim 4-5 árum sem ég var í henni og ef ég hefði ekki meiðst er aldrei að vita hvað hefði gerst," sagði Heiðar sem segist þó ekki sjá eftir neinu. „Það þýðir ekkert að ætla að breyta einhverju eftir á. Ég hef tekið mínar ákvarðanir og þarf að standa með þeim."

Heiðar er nýbúinn að framlengja samning sinn við QPR til loka tímabilsins 2013. Hann segist ekki vita hvað taki við þá. „Ef maður hefur heilsu og áhuga til að halda áfram þá gerir maður það," sagði hann og útilokaði ekki að starfa áfram í knattspyrnuheiminum. „Ég hef verið að fara á þjálfaranámskeið en framhaldið er þó óákveðið."

Heiðar býr í Lundúnum með eiginkonu sinni, Eik Gísladóttur og þremur sonum. Hann segir gott að hafa fjölskylduna með sér.

„Hún hefur ávallt gefið mér mjög mikið. Sama hvernig gengur í fótboltanum þá er fjölskyldulífið alltaf eins – það þarf að vakna með strákunum og fara með þá í skólann. Það breytist ekki og heldur manni á jörðinni," sagði íþróttamaður ársins 2011.

Eiríkur Stefán Ásgeirsson skrifaði fyrir Fréttablaðið.

Íþróttamaður ársins 2010 - Stórkostleg stund í mínu íþróttalífi

Alexander Petersson var í gær kosinn íþróttamaður ársins og endurskrifaði um leið 55 ára sögu kjörsins með því að verða fyrsti íþróttamaður ársins sem er af erlendu bergi brotinn en Alexander er búinn að vera íslenskur ríkisborgari í sex ár.

"Þetta er bara frábært og kom mjög mikið á óvart. Ég bjóst alls ekki við þessu. Ég er enn að átta mig á þessu og því að allir séu að óska mér til hamingju með að vera íþróttamaður ársins. Þetta er stórkostleg stund í mínu íþróttalífi," sagði Alexander strax eftir kjörið greinilega hrærður að hafa fengið styttuna stóru í hendurnar.

Alexander er sjötti handboltamaðurinn á síðustu níu árum sem er kosinn Íþróttamaður ársins en alls hefur handboltamaður hlotið þennan heiður ellefu sinnum. Kosningin var mjög jöfn og munaði aðeins 24 stigum á Alexander og knattspyrnumanninum Gylfa Þór Sigurðssyni sem varð annar. Hópfimleikakonan Íris Mist Magnúsdóttir varð síðan í þriðja sæti sem er besti árangur fimleikakonu frá upphafi í kjörinu.

Alexander tekur við styttunni af Ólafi Stefánssyni sem hefur varðveitt hana tvö síðustu ár. "Ég horfði mikið upp til Óla og núna tíu árum seinna fæ ég að fylgja eftir í hans fótspor og fá þessi verðlaun. Það er mjög skemmtilegt," sagði Alexander.

Ólafur hrósaði líka Alexander í gær. "Alex á þetta svo sannarlega skilið af því að það er frábært að hann skuli fá viðurkenningu fyrir alla þá vinnu sem hann er að leggja á sig. Mér líður ennþá betur með að hann fái þetta. Oft þegar ég kem á landsliðsæfingar þá hálf skammast ég mín fyrir að vera að halda stöðunni frá honum því hann er það góður í henni. Skotin hans eru mögnuð og sprengikrafturinn er mikill," segir Ólafur og heldur áfram: "Hann er okkar mikilvægasti leikmaður að mínu mati því að landsliðið fer allt í einu gang þegar hann byrjar að mæta. Hann er líklega töframaðurinn í allri velgengni liðsins. Hann er lítillátur og karakterinn er allur fallegur og góður. Hann tekur þessu öllu með sinni ró og virðist vera stoltur af því að vera Íslendingur," segir Ólafur.

Alexander átti stóran þátt í því að íslenska landsliðið vann brons á EM í Austurríki en hann var einn af bestu varnarmönnum mótsins og skoraði að auki 3,6 mörk að meðaltali í leik. Það mun enginn heldur gleyma því þegar hann bjargaði marki Pólverja úr hraðaupphlaupi á úrslitastundu í leiknum um þriðja sætið.

"Þetta var rosalega gott ár og það sem meira er það var allt eitthvað nýtt og jákvætt að gerast. Það verður erfitt að toppa þetta ár," segir Alexander og bætir við: "Það var frábær byrjun á árinu að vinna bronsið á EM og það gaf mér mikið sjálfstraust inn í árið. Ég ætlaði líka að gera allt sem ég get og sýna hvað í mér býr. Ég er búinn að horfa nokkrum sinnum á þetta myndband frá leiknum á móti Póllandi og það hvetur mig alltaf áfram að sjá það," segir Alexander.

Fram undan er HM í handbolta og þar vonast Alexander til að geta hjálpað landsliðinu áfram. "Ég vona að HM verði skemmtilegt mót og það væri gaman ef ævintýrið héldi bara áfram hjá mér. Þetta síðasta ár er búið að vera þannig að það er alltaf eitthvað nýtt og skemmtilegt að gerast," segir Alexander.

Guðmundur Guðmundsson landsliðsþjálfari var stoltur af sínum manni.

"Mér finnst þetta frábært og hann er vel að þessu kominn. Hann er frábær liðsmaður og allt það sem var sagt um hann í kringum kjörið er satt og rétt og það var ekkert verið að ýkja eða gera þetta eitthvað betra en það er. Hann hefur staðið sig frábærlega fyrir íslenska landsliðið," segir Guðmundur sem segir Alexander alltaf gefa sig hundrað prósent í öll verkefni.

"Hann hefur oft spilað hálfmeiddur en harkað af sér. Hann er hörkutól og við verðum stundum að passa upp á hann að hann geri ekki of mikið því hann kvartar aldrei. Það er hörku víkingseðli og víkingablóð í honum," segir Guðmundur.

"Þetta er stórkostlegt fyrir mig að fá svona titil og klapp á bakið. Ég get núna sýnt strákunum mínum að ég hafi verið einhvern tímann íþróttamaður ársins. Ég er samt ekki að fara að hætta núna því ég ætla að gera meira og nú er bara að setja stefnuna á að vinna þetta aftur," segir Alexander. Hann er giftur Eivoru Pálu Blöndal og eiga þau synina Lúkas og Tómas. Eivor var mætt í hófið en strákarnir sátu heima. Alexander vissi þó af þeim fyrir framan sjónvarpið.

"Ég veit að strákarnir mínir voru að horfa á þetta í sjónvarpinu. Eldri strákurinn er orðinn sex ára og hann er alveg með það á hreinu hverjir eru bestir. Hann verður örugglega mjög glaður að geta farið í skólann á morgun og sagt: Pabbi minn er besti íþróttamaður ársins. Þetta verður örugglega mjög stórt fyrir hann," segir Alexander að lokum.

Óskar Ófeigur Jónsson skrifaði fyrir Fréttablaðið.

Íþróttamaður ársins 2009 - Þetta var áratugurinn hans Ólafs

Handboltamaðurinn Ólafur Stefánsson endurskrifaði í gær sögu kjörs Samtaka íþróttamanna á Íþróttamanni ársins þegar hann var kosinn Íþróttamaður ársins með fullu húsi annað árið í röð. Ólafur fékk 380 stig af 380 mögulegum og 193 stigum meira en knattspyrnumaðurinn Eiður Smári Guðjohnsen. Í fyrra fékk Ólafur 480 af 480 mögulegum stigum og hlaut þá einnig 193 stigum meira en næsti maður sem var þá Snorri Steinn Guðjónsson.

Knattspyrnufólkið Eiður Smári Guðjohnsen og Þóra Björg Helgadóttir komu í næstu sætum á eftir Ólafi. Þóra var ein af þremur konum meðal efstu fimm í kjörinu en á eftir henni komu körfuboltakonan Helena Sverrisdóttir og frjálsíþróttakonan Helga Margrét Þorsteinsdóttir.

Þetta er í fjórða sinn sem Ólafur hlýtur sæmdarheitið Íþróttamaður ársins en hann fékk einnig þessa viðurkenningu fyrir árin 2002, 2003 og svo aftur 2008. Það hefur aðeins einn maður verið kosinn oftar en Ólafur og það er frjálsíþróttamaðurinn Vilhjálmur Einarsson sem var kosinn fimm sinnum á sex fyrstu árum kjörsins. Ólafur er hins vegar sá fyrsti til að vinna þessi verðlaun fjórum sinnum á sama áratugnum en Vilhjálmur vann þrisvar á sjötta áratugnum og tvisvar í upphafi þess sjöunda.

Hápunktur ársins hjá Ólafi Stefánssyni var án nokkurs vafa seinni úrslitaleikur Meistaradeildarinnar í Quijote Arena í Ciudad Real 31. maí. Ólafur skoraði 8 mörk í leiknum og sá til þess öðrum fremur með frábærri frammistöðu að Ciudad náði að vinna upp fimm marka forskot þýska liðsins Kiel frá því í fyrri úrslitaleiknum í Þýskalandi. Ólafur var borinn á höfuðstól í lok hans sem hetja spænska liðsins.

Ólafur kvaddi spænska liðið Ciudad Real á árinu með því að vinna sinn fimmtánda og sextánda titil með félaginu frá því að hann kom til Spánar sumarið 2002. Auk þess að vinna Meistaradeildina í þriðja sinn á fjórum árum þá varð liðið einnig spænskur meistari þriðja árið í röð.

Það er athyglisvert að Ólafur var einnig kosinn Íþróttamaður ársins tvö ár í röð þegar hann skipti síðast um félag en hann fór frá Magdeburg til Ciudad Real árið 2002 og var þá kosinn Íþróttamaður ársins 2002 og 2003. Ólafur fór til þýska liðsins Rhein Neckar Löwen fyrir núverandi tímabil og hefur verið í aðalhlutverki hjá liðinu í sterkustu deild í heimi.

Viðtal: Hélt að mér yrði refsað fyrir að gera ekkert fyrir Ísland

Ólafur Stefánsson tók við titlinum Íþróttamaður ársins í gær í fjórða sinn og gladdi gesti og sjónvarpsáhorfendur með hógværð sinni og hugsjón. Hann viðurkenndi að hafa ekki verið mikið að pæla í því að hann gæti orðið Íþróttamaður ársins annað árið í röð. "Ég hélt að mér yrði kannski refsað fyrir að hafa ekkert gert á árinu fyrir Ísland þannig að ég var ekkert að hugsa um þetta," sagði Ólafur Stefánsson.

"Þetta var gott ár en kannski má segja að þetta hafi verið hálft gott ár þó svo að það sé búið að vera gaman hjá Löven líka," sagði Ólafur Stefánsson af hógværð og sinni vel þekktu gagnrýnu hugsun. Hann segir að sigurinn í Meistaradeildinni í maí standi upp úr. "Stundin í maí var afrakstur átta til níu mánaða, svita, tára og allt það. Hún var mjög gleðileg og góð en jafnframt óvænt og erfið. Ég sé ekki eftir því að hafa skipt um lið og mér finnst frábært að vera kominn til Þýskalands að reyna eitthvað nýtt og kynnast nýjum hlutum," sagði Ólafur sem segir þýsku deildina reyna á sig. "Það er meira um morgunæfingar sem er ekki skemmtilegt fyrir 36 ára skrokk. Maður venst því bara sem sýnir það að þú getur aðlagast öllu. Manskepnan er aðlögunarhæfasta veran á jörðinni og ég reyni að nýta mér það," segir heimspekingurinn.

"Auðvitað gæti maður hugsað; af hverju ekki að vinna fleiri titla á Spáni? en lífið var bara orðið þannig að það hefði bara verið endurtekning. Það hefði ekki verið þess virði að taka við þessum bikar á ári ef maður er að endurtaka sig," sagði Ólafur og hann segir að Löven-liðið hafi ekki spilað nógu vel í vetur.

Ólafur snýr aftur í íslenska landsliðið á EM í Austurríki eftir meira en ársfrí. "Ég hef gert rétt með því að taka mér frí frá landsliðinu fyrst ég fékk þennan bikar og liðið komst á mótið. Það er því kannski enn þá meiri pressa á mér á mótinu fyrst ég gerði ekkert til þess að koma okkur þangað. Ég verð að reyna þá að hjálpa þar til," segir Ólafur en breidd liðsins sýndi sig í keppninni. "Það komu margir góðir þættir út úr því að ég var ekki með í undankeppni EM og fyrst að við komumst þá er ég ekki með neitt samviskubit," sagði Ólafur að lokum.

Óskar Ófeigur Jónsson skrifaði fyrir Fréttablaðið.

Íþróttamaður ársins 2008 - Ólafur með fullt hús stiga

„ÞETTA var ótrúlegt ár hjá mér, jafnt líkamlega sem andlega og hreinlega bara á öllum sviðum. Ég er afar þakklátur fyrir það,“ sagði Ólafur Stefánsson handknattleiksmaður í samtali við Morgunblaðið eftir að hann var kjörinn Íþróttamaður ársins 2008 af Samtökum íþróttafréttamanna. Þetta var í þriðja sinn sem Ólafur hreppir hnossið en hann varð einnig fyrir valinu 2002 og 2003. Að þessu sinni hlaut Ólafur fullt hús stiga í kjörinu, 480. Í öðru sæti varð Snorri Steinn Guðjónsson, handknattleiksmaður, og í þriðja sæti varð Margrét Lára Viðarsdóttir knattspyrnukona.

„Ég er að toppa núna sem íþróttamaður 35 ára gamall vegna þess að fram kom hópur fullbúinna einstaklinga sem eru með mér í liði auk þess sem þjálfarinn er frábær,“ sagði Ólafur og vísar þar til félaga sinna í íslenska landsliðinu í handknattleik og þjálfara þess, Guðmundar Þórðar Guðmundssonar, sem á árinu unnu til silfurverðlauna í handknattleikskeppni Ólympíuleikanna í Peking. Eftir því var tekið að á meðan Ólafur var hylltur af gestum, sem viðstaddir voru kjörið í gær, vísaði hann út í salinn og benti á samherja sína í íslenska landsliðinu og forystumenn handknattleikshreyfingarinnar sem þar sátu.

„Ég held að það sé alveg ljóst að ég stæði ekki í þessum sporum, að vera kjörinn íþróttamaður ársins, án þess sem við unnum saman á Ólympíuleikunum þótt ég hafi átt frábært ár með félagsliði mínu. Þar af leiðandi lít ég á mig sem fulltrúa þessa hóps sem vann silfrið í Peking,“ sagði Ólafur spurður út í samherja sína sem hann tileinkaði heiðurinn.

„Ég er svo glaður með að hafa haldið áfram með landsliðinu, ekki hætt og farið að fylgjast með úr fjarlægð. Um leið er ég þakklátur fyrir að hafa verið virkur þátttakandi í þessu ævintýri sem við skópum. Það er hreint æðislegt að vera hluti af þessum hóp. Þær minningar munu ylja mér um ókomin ár.

Þessu til viðbótar koma síðan „bónusar“ eins og sigur í meistaradeild Evrópu með Ciudad Real, Spánarmeistaratitill og fleira. Grunninn að því er maður að leggja með æfingum tíu til ellefu mánuði á ári hverju. Þannig að ég er mjög glaður,“ sagði Ólafur og bætti við að í upphafi ársins 2008 hafi ekki blásið byrlega eftir þrálát meiðsli í læri sem illa gekk að fá bót á. „En þegar það lagaðist small allt saman,“ sagði hann. Auk þess að vinna silfurverðlaun með landsliðinu á ÓL í Peking í sumar var Ólafur í sigurliði í meistaradeild Evrópu, markahæsti maður meistaradeildar, Spánarmeistari, bikarmeistari þar í landi og í sigurliði í keppninni um risabikar Evrópu á haustmánuðum.

Íþróttamaður ársins 2007 - Margrét Lára best

„ÞETTA er tvímælaust mesta viðurkenning sem ég hef hlotið á mínum ferli til þessa. Engin verðlaun hafa komið mér jafnmikið á óvart og þessi. Þegar ég kom á Grand Hótel í kvöld þá vissi ég það eitt að ég væri í hópi tíu frábærra íþróttamanna sem til greina kæmu,“ sagði hin 21 árs gamla knattspyrnukona, Margrét Lára Viðarsdóttir, við Morgunblaðið, hálfklökk eftir að hafa verið valin íþróttamaður ársins 2007 með nokkrum yfirburðum af Samtökum íþróttafréttamanna í hófi á Grand Hóteli.

Margrét Lára er fyrsta knattspyrnukonan sem hlýtur þessa viðurkenningu, sem var afhenti í 52. sinn í gær, og fjórða konan sem kosin er íþróttamaður ársins.
Margrét Lára er fremst knattspyrnukvenna hér á landi og hún segir það hafa kostað þrotlausa vinnu frá unga aldri en að hún eigi enn mikla vinnu fyrir höndum til að bæta sig enn frekar. „Ég set mér markmið og legg hart að mér til þess að ná þeim. Það hef ég gert frá unga aldri,“ segir Margrét, sem æft hefur knattspyrnu frá 5 ára aldri. „Ég get örugglega á stundum verið óþolandi í hóp þegar ég rek á eftir félögum mínum um leið og ég legg harðar að sjálfri mér. Ég geri alltaf mestar kröfur til mín.
Ég er hluti af liði í hópíþrótt og án góðra samherja nær maður ekki langt. Það þarf að skapa liðsheild með góðum leikmönnum, það er ekki nóg að hafa einn góðan leikmann. Síðan má ekki gleyma fjölskyldunni og vinum sem staðið hafa þétt við bakið á mér  meira
 

Íþróttamaður ársins 2006 - Guðjón Valur bestur

"ÞAÐ er í fyrsta lagi mikill heiður að fá að tilheyra svona hópi frábærra íþróttamanna og í öðru lagi að fá svona viðurkenningu, þó að ekki sé nema einu sinni á lífsleiðinni, er ekkert nema frábært," sagði nýkrýndur íþróttamaður ársins 2006, Guðjón Valur Sigurðsson, handknattleiksmaður hjá Gummersbach, eftir að hann hafði veitt nýjum verðlaunagrip, sem fylgir nafnbótinni, móttöku í gær. Viðurkenningin fullkomnar árið hjá kappanum því í vor var hann valinn besti leikmaður þýsku deildarinnar og einnig var hann markahæsti maður hennar.

"Það er mjög erfitt fyrir ykkur sem að þessu vali standið að bera saman íþróttagreinar og erfitt að velja menn úr hópíþróttum og þessar viðurkenningar í Þýskalandi

"Það var ekkert voðalega auðvelt!" segir Guðjón Valur enda meira

 

Íþróttamaður ársins 2005 - Eiður Smári bestur

Íþróttamaður ársins 2005 var útnefndur í hófi á Grand Hótel Reykjavík þriðjudaginn 3. janúar. Þetta var í 50. sinn sem Samtök íþróttafréttamanna, SÍ, standa að kjörinu frá stofnun þeirra árið 1956, og styttan glæsilega, sem fylgt hefur nafnbótinni, var afhent í síðasta sinn. Í reglum SÍ kveður á um að styttan skuli afhent í 50 skipti en eftir það verður hún afhent Þjóðminjasafni Íslands.

Atkvæðagreiðslan er leynileg og fer þannig fram að hver félagsmaður SÍ setur saman lista með nöfnum tíu íþróttamanna sem honum þykja hafa skarað fram úr á árinu. Efsti íþróttamaður hvers lista fær 20 stig, sá sem er í öðru sæti 15 stig, þriðja sætið gefur 10 stig, fjórða sætið 8 o.s.frv. eins og getið er nánar um í reglugerð SÍ um kjörið.

Eiður Smári hlaut yfirburðakosningu - fékk fullt hús stiga eða 460 atkvæði. Guðjón Valur Sigurðsson, landsliðsmaður í handknattleik og leikmaður Gummersbach í Þýskalandi, varð annar með 287 atkvæði og Ásthildur Helgadóttir, fyrirliði íslenska landsliðsins í knattspyrnu og leikmaður Malmö í Svíþjóð, varð þriðja með 203 atkvæði.

Eiður Smári braut blað í sögu íslenskrar knattspyrnu  meira